Biden, urdhër ekzekutiv: “Nxirrni dokumentet sekrete të 11 shtatorit!

Presidenti Joe Biden nënshkroi një urdhër ekzekutiv që urdhëron publikimin e disa dokumenteve sekrete të lidhura me sulmet terroriste të 11 shtatorit 2001.

Vendimi konsiderohet një gjest mbështetës për familjet e viktimave që kanë kërkuar prej kohësh të dhëna, me shpresën të gjejnë informacione që përfshin qeverinë saudite në ngjarjet e atij viti. Qeveria amerikane kritikohet për fshehjen e këtyre dokumenteve, pasi ato përmbajnë dëshmi mbi rolin e Arabisë Saudite në sulmet e 11 Shtatorit. Me qindra njerëz nga familjet e viktimave kanë ngritur padi kundër Arabisë Saudite, me akuzën se ky vend është përfshirë në sulmet e 11 Shtatorit, por Riadi i mohon këto akuza. Urdhri, i cili vjen pak më shumë se një javë para 20 vjetorit të sulmeve, është një moment domethënës në një debat shumëvjeçar mes qeverisë dhe familjarëve të viktimave, rreth asaj se çfarë ka në dokumentet e konsideruara sekrete në lidhje me sulmet dhe që ato të mund të bëhen publike. Ky konflikt u shfaq muajin e kaluar kur rreth 1,800 të afërm të viktimave, të mbijetuar dhe punonjës së vijës së parë të frontit thanë se ishin kundër pjesëmarrjes së Presidentit Biden në ngjarjet përkujtimore të 11 shtatorit 2001 nëse dokumentet mbeteshin sekrete. “Ngjarjet në fjalë ndodhën dy dekada më parë, dhe ato kanë të bëjnë me një moment tragjik që vazhdon të jehojë në historinë e vendit dhe në jetën e kaq shumë amerikanëve”, thuhet në urdhrin ekzekutiv. “Prandaj është jetike të sigurohet që qeveria e Shteteve të Bashkuara të maksimizojë transparencën, duke u mbështetur në klasifikimin si informacion sekret vetëm kur është e nevojshme”. Urdhri udhëzon Departamentin e Drejtësisë dhe agjencitë e tjera të degës ekzekutive që të fillojnë një rishikim të dokumenteve dhe kërkon që ato të publikohen brenda gjashtë muajve të ardhshëm.