Talibanët paralajmërojnë SHBA kundër destabilizimit të qeverisë afgane

Talibanët kanë paralajmëruar Shtetet e Bashkuara kundër destabilizimit të qeverisë në Afganistan, pasi të dy palët mbajtën takimin e tyre të parë ballë për ballë që nga tërheqja e forcave të huaja nga Afganistani.

Ministri i jashtëm taleban, Amir Khan Muttaki, tha të Shtunën se autoritetet talebane u thanë përfaqësuesve të SHBA në Doha se çdo përpjekje për të "dobësuar qeverinë ekzistuese në Afganistan ... mund të çojë në probleme për njerëzit". "Ne u kemi thënë atyre qartë se përpjekja për të destabilizuar qeverinë në Afganistan nuk është e mirë për askënd," tha Muttaki, duke shtuar: "Marrëdhëniet e mira me Afganistanin janë të mira për të gjithë." Ministri i jashtëm taleban i bëri deklaratat në ditën e parë të bisedimeve me një ekip amerikan në kryeqytetin e Katarit. Ministri i jashtëm taleban tha se delegacioni afgan dhe homologët amerikanë diskutuan "hapjen e një faqeje të re" midis dy vendeve. Përfaqësuesit talebanë gjithashtu kërkuan nga SHBA që të heqë bllokimin e rezervave të bankës qendrore afgane.