Ministria ruse e Mbrojtjes: Nuk ka rrezik për popullsinë civile

Ministria ruse e mbrojtjes deklaroi se qeveria ukrainase po përdor video të inskenuara për të akuzuar forcat ruse për kryerjen e sulmeve pa dallim kundër objektivave civile, duke theksuar se operacioni ushtarak i Moskës në Ukrainë nuk përbën kërcënim për popullsinë civile.

Në një deklaratë të enjten, zëdhënësi kryesor i ministrisë, Igor Konashenkov tha se "armët me precizion të lartë të Forcave të Armatosura Ruse çaktivizojnë vetëm infrastrukturën ushtarake, objektet e mbrojtjes ajrore, aeroportet ushtarake dhe avionët e Forcave të Armatosura të Ukrainës". Komentet e Konashenkov erdhën pasi Kievi pretendoi se sulmet me raketa nga forcat ruse kishin marrë edhe jetën e civilëve. “Ne tërheqim vëmendjen e mediave se Shërbimi i Sigurisë së Ukrainës po përgatit dhe po zbaton tashmë provokime sipas modeleve të njohura të Helmetave të Bardha,” tha Igor Konashenkov. “Në qytetet ukrainase, u bënë xhirime të inskenuara me video me të ashtuquajturat ‘viktima masive’ në mesin e popullatës civile të Ukrainës. Videot e përgatitura shpërndahen përmes kanaleve të kontrolluara të telegramit dhe rrjeteve sociale”, tha Konashenkov, duke shtuar: “Qëllimi i tyre është të akuzojnë Rusinë për sulme të supozuara jo selektive dhe disproporcionale për të frikësuar popullsinë civile dhe për të transmetuar propagandë në kanalet televizive perëndimore”. “Forcat e Armatosura Ruse nuk godasin qytetet e Ukrainës... Asgjë nuk kërcënon popullsinë civile”, shtoi zëdhënësi. "Si rezultat i sulmeve të kryera nga forcat e armatosura ruse, 74 objekte tokësore ushtarake ukrainase u shkatërruan," tha Igor Konashenkov, duke specifikuar se objektet e shkatërruara përfshinin 11 fusha ajrore. Zyrtari rus shtoi se një helikopter ushtarak ukrainas dhe katër dronë u rrëzuan gjithashtu.