Lavrov: Rusia do të kryejë operacionin në Ukrainë "deri në fund"

Rusia thotë se fuqitë perëndimore kanë ambiciet e një lufte bërthamore, por Moska do të vazhdojë me operacionin e saj ushtarak në Ukrainë deri në "fund".

“Mendimi i një lufte bërthamore po rrotullohet vazhdimisht në kokat e politikanëve perëndimorë, por jo në kokat e rusëve”, tha ministri i Jashtëm rus Sergei Lavrov në një intervistë me televizionin shtetëror të enjten. “Ju siguroj se nuk do të lejojmë asnjë lloj provokimi të na çekuilibrojë”, tha Lavrov, duke theksuar se Moska do të insistojë në dispozitat që do të pengonin Ukrainën të shndërrohej në një kërcënim ushtarak ose të anëtarësohej në NATO. Ai akuzoi NATO-n se kërkon të ruajë supremacinë mbi Rusinë, duke thënë se qeveria e tij nuk do të lejojë askënd të minojë interesat e kombit rus. Ai akuzoi gjithashtu presidentin ukrainas Volodymyr Zelensky për kryesimin e "një shoqërie ku nazizmi po lulëzon". Lavrov më tej iu kundërpërgjigj pretendimeve të Ukrainës se zonat civile po sulmohen. Ai tha se trupat ruse kanë urdhra të rrepta për të përdorur armë me precizion të lartë vetëm për të shkatërruar infrastrukturën ushtarake dhe jo zonat e banuara. Rusia, tha ai, ka një vullnet të mirë dhe do të gjendet një zgjidhje për krizën në Ukrainë.