Rusia paralajmëron Perëndimin rreth armatosjes së Ukrainës

Një zyrtar rus tha: Situata mund të shkaktojë një konfrontim ushtarak nëse vendet perëndimore, të udhëhequra nga Shtetet e Bashkuara, vazhdojnë të dërgojnë armë dhe municione në Ukrainë.

Rusia ka paralajmëruar Shtetet e Bashkuara dhe vendet perëndimore se një konfrontim ushtarak është i mundshëm nëse vendet e udhëhequra nga perëndimi vazhdojnë të dërgojnë armë dhe municione në Ukrainë, sipas CCTV. Ambasadori i Rusisë në Shtetet e Bashkuara, Anatoly Antonov, i bëri këto komente në një intervistë për Newsweek në Nju Jork, duke shtuar se Ukraina tani ishte plot me armë perëndimore. Përpara deklaratës nga ambasadori i Rusisë në Shtetet e Bashkuara, kryeministri britanik Boris Johnson të shtunën në mes të konfliktit Ukrainë-Rusi, pas një takimi me presidentin ukrainas Volodymyr Zelinsky në Kiev, premtoi se do t'i japë më shumë ndihmë ekonomike dhe ushtarake Kievit.  Johnson të shtunën mbërriti në kryeqytetin ukrainas, Kiev, për një vizitë njëditore. Sipas një deklarate nga Zyra e Kryeministrit britanik, gjatë vizitës së tij, Johnson ofroi ndihmë të re ushtarake për Ukrainën, duke përfshirë 120 automjete të blinduara dhe sisteme të reja raketore kundër anijeve. Ai gjithashtu premtoi se do t'i japë Ukrainës 500 milionë dollarë të tjera kredi nëpërmjet Bankës Botërore. Ministrat e Jashtëm të Organizatës së Traktatit të Atlantikut të Veriut (NATO) të mërkurën mbajtën një takim në Bruksel për të rritur mbështetjen e tyre ushtarake për Ukrainën. Sekretari i Përgjithshëm i NATO-s, Jens Stoltenberg, ka thënë se disa aleatë tashmë po i ofrojnë Ukrainës një sasi të konsiderueshme armësh të rënda të avancuara dhe ai pret që ministrat e jashtëm të ndërmarrin më shumë angazhime me qëllim që NATO të mund të  mbështesë më tej Ukrainën.  Sekretari amerikan i Shtetit, Anthony Blinken të martën tha se Shtetet e Bashkuara do të ofrojnë 100 milionë dollarë më shumë në ndihmë ushtarake për Ukrainën, duke përfshirë sistemet antitank.