Vazhdon dhuna e ushtrisë së Mianmarit kundër popullit të këtij vendi
Kombet e Bashkuara thonë se ushtria e Mianmarit vazhdon të përdorë dhunë dhe presion ndaj popullit.
Nolin Haizer, përfaqësuesi Special i Sekretarit të Përgjithshëm të OKB-së për Mianmarin, në një fjalim në Asamblenë e Përgjithshme të OKB-së tha se rreth 600 grupe të armatosura janë formuar në Mianmar që nga grushti i shtetit. “Pas grushtit të shtetit të 1 shkurtit 2021 në Mianmar, 14,400,000 njerëz, një e katërta e popullsisë, kanë nevojë për ndihmë humanitare”, tha Haizer. Zyrtari i OKB-së gjithashtu vuri në dukje se ushtria e Mianmarit vazhdon të përdorë dhunë dhe forcë disproporcionale, duke shtuar se 14,000 njerëz janë arrestuar që nga grushti i shtetit dhe dhjetëra të tjerë kanë vdekur në burgjet e Mianmarit. Raporti i Përfaqësuesit Special të OKB-së për Mianmarin mbi dhunën e vazhdueshme në vend nga forcat e ushtrisë antipopullore dhe kundërshtarët e grushtit të shtetit tregon se sundimtarët ushtarakë të Mianmarit vazhdojnë të përdorin forcën për të ruajtur status quo-në. Ushtria e Mianmarit, e cila mori pushtetin në një grusht shteti në shkurt 2021 me pretekstin e manipulimit të zgjedhjeve parlamentare të vendit, burgosi një numër ish-udhëheqës të qeverisë, por ajo ishte zotuar të heqë dorë nga pushteti përmes zgjedhjeve të përgjithshme deri në fund të vitit të kaluar. Më shumë se një vit pas grushtit të shtetit në Mianmar, ushtria në pushtet jo vetëm që ka dështuar të hapë rrugën për kthimin e demokracisë, por vazhdon të vendosë diktaturë ndërsa dhuna kundër popullit dhe protestuesit vazhdojnë të përshkallëzohen në Mianmar. Ushtria në pushtet e Mianmarit, pas presionit të muajve të fundit nga Shoqata e Kombeve të Azisë Juglindore (ASEAN) dhe kërcënimit të saj për të përjashtuar Mianmarin nga unioni, ka premtuar edhe një herë zgjedhje por këto premtime nuk janë përmbushur. Vazhdimi i grushtit të shtetit në Mianmar, përveçse shkaktoi pengesa politike në vend dhe prishi imazhin e Mianmarit në komunitetin ndërkombëtar, ka pasur edhe efekte shkatërruese ekonomike dhe sociale. Sipas Përfaqësuesit Special të OKB-së për Mianmar, të paktën një e katërta e popullsisë së vendit ka nevojë për ndihmë humanitare pas grushtit të shtetit të shkurtit 2021. Pas grushtit të shtetit në Mianmar, për shkak të kushteve jonormale të prodhimit dhe tregtisë përmes aplikimit të gjendjes së jashtëzakonshme, daljes së kapitalit vendas, ndërprerjes së çdo investimi të huaj, si dhe rënies së paparë të tregtisë ndërkombëtare, u parashikua që situata ekonomike dhe jeta e njerëzve të përballen me sfida të mëdha, ashtu siç konfirmon edhe raporti i Përfaqësuesit Special të OKB-së.
