Shoigu: Shkatërroni raketat dhe artilerinë e armikut!

Gati pesë muaj pas luftës Rusi-Ukrainë, Moska ka urdhëruar trupat ruse që të kenë prioritet shkatërrimin e raketave me rreze të gjatë të furnizuara nga Perëndimi për Ukrainën, duke thënë se raketat e avancuara po përdoren për të goditur linjat ruse të furnizimit.

Të hënën, ministri rus i mbrojtjes Sergei Shoigu urdhëroi gjeneralët e tij që t'i jepnin përparësi shkatërrimit të raketave dhe armëve të artilerisë me rreze të gjatë veprimi të Ukrainës. Urdhri i tij erdhi pasi armët e furnizuara nga Perëndimi u përdorën për të goditur linjat ruse të furnizimit. Sipas një deklarate të ministrisë ruse të mbrojtjes, pas inspektimit të grupit Vostok që po lufton në Ukrainë, Shoigu "udhëzoi komandantin e këtij grupi që t'i jepte përparësi shkatërrimit të raketave me rreze të gjatë veprimi dhe armëve artilerike të armikut". Deklarata pohoi gjithashtu se këto armë po përdoreshin për të goditur zonat e banuara të Donbasit të kontrolluar nga Rusia dhe për t'i vënë zjarrin qëllimisht fushave të grurit dhe depove të ruajtjes së grurit. Kievi shpreson se lufta është në një pikë kthese, duke pretenduar se Rusia ka përdorur aftësitë e saj të sulmit për të kapur disa qytete të vogla në Ukrainën lindore, ndërsa trupat ukrainase tani kanë vënë në terren raketa me rreze të gjatë të furnizuara nga Perëndimi që mund të godasin pas linjave ruse.