Kina dëshiron të zgjerojë kontrollin mbi Paqësorin perëndimor

Tajvani paralajmëroi sot se manovrat ushtarake të Kinës nuk janë thjesht stërvitje ushtarake për pushtimin e ishullit të vetë-qeverisur, por ato pasqyrojnë ambiciet e Kinës për të kontrolluar zona të gjera të Paqësorit perëndimor.

Joseph Wu, ministri i jashtëm i Tajvanit, tha: Kina ka përdorur manovrat dhe librin e saj të luftës për t'u përgatitur për të sulmuar Tajvanin. Ai theksoi: Pekini ka nisur manovra ushtarake në shkallë të gjerë dhe lëshime raketash së bashku me sulmet kibernetike, një fushatë dezinformimi dhe presioni ekonomik për të dobësuar moralin e popullit në Tajvan. Paralajmërimi bëhet ndërsa Tajvani filloi sot manovrat e veta ushtarake për të treguar se është gati të mbrohet nga një sulm i mundshëm kinez. E irrituar nga Kryetarja e Dhomës së Përfaqësuesve të Kongresit amerikan, Nancy Pelosi, që vizitoi Tajvanin ditët e fundit, Kina dërgoi anijet dhe avionët e vet, përtej vijës që ndan të dy palët në ngushticën e Tajvanit. Raketat e lëshuara nga Kina ranë në ujërat pranë Tajvanit. Manovrat kineze filluan të enjten dhe kanë ndërprerë fluturimet dhe transportin në një prej zonave më të ngarkuara tregtare në botë. Megjithë thirrjet për të uljen e tensioneve, Pekini vendosi t’i zgjasë manovrat pa përcaktuar një datë për përfundimin e tyre.