SHBA dërgojnë dronë spiunë në Ukrainë

Një paketë armësh e miratuar së fundmi nga Pentagoni për të luftuar forcat ruse në rajonin e Donbasit të Ukrainës do të përfshijë dronë spiunë, automjete rezistente ndaj minave dhe pjesë artilerie së bashku me 36,000 predha.

Sipas raportimeve të mediave, paketa e re e ndihmës ushtarake prej 775 milionë dollarësh do të përfshijë 15 dronë Scan Eagles, 40 automjete rezistente ndaj minave, mijëra raketa të drejtuara me precizion për sistemet HIMARS që kanë lejuar forcat ukrainase të godasin qendrat ruse të komandës dhe depot e municioneve shumë prapa vijës së frontit, dhe më shumë armë kundër tankeve duke përfshirë raketat TOW dhe sistemet Javelin. "Ne duam të sigurohemi që Ukraina të ketë një rrjedhë të qëndrueshme municionesh për të përmbushur nevojat e saj dhe kjo është ajo që ne po bëjmë me këtë paketë," u tha gazetarëve një zyrtar i lartë i mbrojtjes amerikane. "Këto aftësi janë të kalibruara me kujdes për të bërë dallimin më të madh në fushën e betejës dhe për të forcuar pozicionin e Ukrainës në tryezën e negociatave," tha Sekretari i Shtetit Antony Blinken në një deklaratë të premten. Në deklaratë, Blinken tha se paketa e fundit ushtarake për Ukrainën do të përfshijë "armë, municione dhe pajisje shtesë".