Kina: SHBA  përfituesja më e madhe nga lufta në Ukrainë

Zëdhënësi i Ministrisë së Jashtme kineze Zhao Lijian ka akuzuar Shtetet e Bashkuara për krijimin e krizës aktuale në Ukrainë, duke thënë se Uashingtoni është përfituesi kryesor i konfliktit në vazhdim.

Zhao i bëri komentet në një konferencë të rregullt për shtyp në Pekin, pas raportimeve se evropianët janë detyruar të importojnë gaz natyror nga SHBA me çmime të larta mes një krize energjie të përkeqësuar me të cilën po përballen shumë vende evropiane për shkak të operacionit ushtarak të Rusisë në Ukrainë. “Me sa duket, ashtu si tregtarët e armëve dhe drithërave, tregtarët e energjisë në SHBA me siguri nuk do ta humbin këtë mundësi për ta kthyer krizën në një minierë ari, pasi ata nxjerrin fitime të majme nga aleatët e SHBA-së,” tha zëdhënësi i Ministrisë së Jashtme kineze. “Shtetet e Bashkuara krijuan krizën e Ukrainës dhe tani janë bërë përfituesi më i madh duke qëndruar e qetë përtej oqeanit dhe duke përfituar nga kriza”, shtoi ai. Zëdhënësi kinez theksoi më tej se janë evropianët e zakonshëm ata që po paguajnë çmimin me rritjen e faturave të energjisë elektrike, temperaturat më të ulëta të ngrohjes dhe madje edhe ndërprerjet e organizuara të energjisë elektrike. Komentet e tij erdhën pas raportimeve se çmimet e gazit natyror në Evropë janë më shumë se 10 herë më të larta se çmimet e gazit në SHBA, një hendek rekord. Sipas shifrave të zbuluara nga Business Insider, kompanitë amerikane po fitojnë më shumë se 100 milionë dollarë për çdo dërgesë të gazit natyror të lëngshëm në Evropë.