Rusia sulmon pozicionet e Ukrainës pasi Kievi goditi centralin bërthamor

Rusia tha se ka goditur disa nga pozicionet e Ukrainës pas bombardimeve nga pala ukrainase të disa pikave pranë termocentralit më të madh bërthamor në Evropë, Zaporizhzhia.

Ministria ruse e Mbrojtjes tha të shtunën se forcat e saj kishin kryer sulme në rajonet Kherson, Mykolaiv, Kharkiv dhe Donetsk. Sipas ministrisë, forcat ukrainase kishin kryer një ofensivë të pasuksesshme pranë rajonit Pravdyne në Kherson. Ministria ruse e Mbrojtjes tha se dy incidente të bombardimeve ukrainase ishin regjistruar pranë uzinës bërthamore të shtunën, por situata e rrezatimit në stacion mbetet normale. "Regjimi i Kievit ka rifilluar provokimet e tij duke kërcënuar të krijojë një fatkeqësi humanitare në termocentralin bërthamor të Zaporizhzhia," tha zëdhënësi i Ministrisë ruse të Mbrojtjes, Igor Konashenkov. “Në total, 15 predha u qëlluan nga zona e Nikopolit të rajonit të Dnepropetrovsk. Njësitë e artilerisë së Forcave të Armatosura të Ukrainës u shtypën nga zjarri i kundërt i forcave ruse”, tha Konashenkov. Ministria e Jashtme e Ukrainës ka mohuar narrativën e Moskës. Ukraina dhe aleatët e saj perëndimorë, akuzojnë Rusinë për përdorimin e uzinës bërthamore të Zaporizhzhias si bazë ushtarake për të qëlluar ndaj ukrainasve. Presidenti Volodymyr Zelensky ka akuzuar gjithashtu Rusinë për kryerjen e akteve të "terrorizmit bërthamor".