Koreja e Jugut kërcënon Veriun me përgjigjen e aleatëve ndaj një prove tjetër bërthamore

Presidenti i Koresë së Jugut, Yoon Suk-yeol e ka kërcënuar Korenë e Veriut me një përgjigje të përbashkët të paprecedentë me aleatët e vendit të tij, nëse Pheniani vazhdon me testin e shtatë bërthamor.

Në një intervistë me Reuters, Yoon tha: "Do të ishte jashtëzakonisht e pamatur që Koreja e Veriut të kryente një test të shtatë bërthamor". Kur u pyet se çfarë do të bënin Koreja e Jugut dhe aleatët e saj, Shtetet e Bashkuara dhe Japonia, si përgjigje, Yoon tha se përgjigja "do të jetë diçka që nuk është parë më parë". Presidenti i Koresë së Jugut i bëri thirrje gjithashtu Kinës, aleatit të ngushtë të Koresë së Veriut, që të ndihmojë në largimin e Phenianit nga ndjekja e zhvillimit të armëve dhe raketave bërthamore. “Ajo që është e sigurt është se Kina ka aftësinë të ndikojë në Korenë e Veriut dhe Kina ka përgjegjësinë të angazhohet në proces”, tha Yoon. I takon Pekinit, shtoi ai, të vendosë nëse do ta ushtrojë atë ndikim për paqen dhe stabilitetin në rajon. Në fillim të këtij muaji, përpara samitit të G20, Presidenti i SHBA Joe Biden i tha presidentit kinez Xi Jinping se Pekini kishte një detyrim të përpiqej të ndalonte Phenianin nga kryerja e një prove të shtatë bërthamore. Udhëheqësi i Koresë së Veriut Kim Jong-un tha të dielën se qëllimi përfundimtar i vendit të tij ishte të zotëronte forcën strategjike më të fuqishme në botë.