Gjermania përfshihet nga grevat
Një grevë tetë-orëshe e thirrur nga sindikata gjermane e hekurudhave ka ndaluar udhëtimet mëngjesin e sotëm, ndërsa greva pati edhe në katër aeroporte gjermane, gjithashtu në protestë për pagat dhe kostot e jetesës.
Sindikata e hekurudhave EVG lëshoi me sukses thirrjen e saj për braktisjen e punës nga ora 3 e mëngjesit deri në 11 në linjat kryesore shtetërore hekurudhore Deutsche Bahn, duke anuluar udhëtimet e trenave në distanca të largëta dhe ato rajonale. EVG tha se do të shtojë presionin ndaj punëdhënësve për rritje të pagave, edhe pse Deutsche Bahn, e quante grevën “të kotë dhe të panevojshme”. Greva e sotme vjen pas asaj të 27 marsit kur për 24 orë linjat hekurudhore ishin të paralizuara, në koordinim me sindikatën tjetër Ver.di, ku përfshihen dhe punonjës aeroportesh. Ver.di i bëri thirrje sot punonjësve të saj të sigurisë dhe shërbimeve në aeroportet e Duesseldorf, Coln-Bonn dhe Hamburg për grevë dy ditore. Aeroporti i Stuttgartit gjithashtu kishte greva sot. Sindikatat kërkojnë rritje page prej 10 deri në 12 përqind teksa negociatorët kanë propozuar kompromise që çojnë në rritje disi më të vogla. Qeveria gjermane thotë se inflacioni për muajin mars ishte në masën 7.4 përqind.
