Rusia dëbon diplomatët gjermanë

Rusia ka shpallur 'persona non grata' 40 pjesëtarë të misionit diplomatik gjerman në përgjigje të një hapi të mëparshëm të Berlinit që dëboi diplomatët rusë lidhur me konfliktin në Ukrainë.

Rusia ka kritikuar vendimin e Gjermanisë për të dëbuar në masë diplomatët rusë, duke thënë se ka vendosur t'i përgjigjet reciprokisht këtij veprimi. Ministria e Jashtme ruse e bëri njoftimin të shtunën, duke thënë se njoftoi zyrtarisht ambasadorin gjerman në Moskë, Geza Andreas von Geyr për vendimin më 5 prill. "Autoritetet gjermane kanë vendosur për një tjetër dëbim masiv të punonjësve të misioneve diplomatike ruse në Gjermani. Ne dënojmë fuqishëm këto veprime të Berlinit, i cili vazhdon të shkatërrojë në mënyrë sfiduese të gjithë gamën e marrëdhënieve ruso-gjermane," tha Ministria e Jashtme ruse. “Si përgjigje ndaj veprimeve armiqësore të Berlinit, pala ruse ka vendosur të pasqyrojë vendimin dhe të dëbojë diplomatët gjermanë nga Rusia, si dhe të kufizojë ndjeshëm numrin e punonjësve të misioneve diplomatike gjermane në vendin tonë”, thuhet në deklaratë. Maria Zakharova, zëdhënësja e Ministrisë së Jashtme ruse, i tha agjencisë së lajmeve RIA Novosti se Moska po dëbonte më shumë se 40 diplomatë gjermanë. Marrëdhëniet midis Moskës dhe Berlinit janë prishur që kur Rusia nisi "operacionin e saj special ushtarak" në Ukrainë në fund të shkurtit 2022. Vendet perëndimore kanë vendosur sanksione të paprecedenta ekonomike kundër Moskës, ndërkohë që kanë furnizuar shumë dërgesa të armatimit të rëndë në Kiev. Gjermania, së bashku me SHBA-në, ka qenë ndër furnizuesit më të mëdhenj të armëve për Ukrainën.