Ushtria sudaneze ra dakord të zgjasë armëpushimin 72-orësh
Ushtria sudaneze të enjten në një deklaratë njoftoi se ka rënë dakord të zgjasë armëpushimin në vend për 72 orë.
Sipas Al Jazeera, në deklaratën e ushtrisë sudaneze thuhej: Komanda e forcave të armatosura ra dakord për zgjatjen e armëpushimit të propozuar për 72 orë të tjera, e cila do të hyjë në fuqi nga data e përfundimit të armëpushimit aktual. Ushtria sudaneze shtoi: Zgjatja e armëpushimit bazohet në përpjekjet e palëve saudite dhe amerikane për të ndihmuar në qetësimin e situatës dhe për të krijuar kushte të përshtatshme për largimin e shtetasve të huaj dhe për të lehtësuar aspektet humanitare për qytetarët sudanezë. Ushtria sudaneze shprehu shpresën se milicitë e Forcave të Mbështetjes së Shpejtë kësaj radhe do t'i përmbahen kërkesave të armëpushimit dhe nuk do ta shkelin atë ashtu si në periudhën e kaluar duke bombarduar institucionet dhe vendet ushtarake, duke vandalizuar objekte jetike dhe duke rrezikuar jetën dhe pronën e qytetarëve. Lidhur me këtë, Forcat e Mbështetjes së Shpejtë kanë bërë të ditur se kanë rënë dakord për zgjatjen 72-orëshe të armëpushimit, e cila do të fillojë mëngjesin e së premtes. Ndërkohë, luftime të ashpra në Sudan të enjten në ditën e fundit të armëpushimit tre-ditor përfshiu më shumë zona të vendit. Në këto përleshje deri më tani janë vrarë 512 persona dhe mijëra të tjerë janë plagosur. Volker Peretz, kreu i misionit të Kombeve të Bashkuara në Sudan, njoftoi se të dyja palët e konfliktit sulmuan zonat e banuara dhe nuk u kushtuan vëmendje civilëve dhe automjeteve që po transportonin të plagosurit dhe të sëmurët në spitale. Kombet e Bashkuara kanë njoftuar se 27,000 sudanezë kanë ikur në Egjipt, Etiopi, Çad dhe Sudanin e Jugut. Sipas njoftimeve zyrtare, deri më tani 6 mijë shtetas të vendeve të ndryshme kanë hyrë në Etiopi përmes pikës kufitare “Al-Qalabat”. Abdoud Ding, koordinatori humanitar i OKB-së në Sudan, bëri thirrje për hapjen e vendkalimit të ndihmës humanitare në Sudan, përveç vendosjes së armëpushimit. Në të njëjtën kohë me konfliktet, vazhdon operacioni i evakuimit të shtetasve të huaj në mënyra të ndryshme tokësore ose ajrore. Një armëpushim 3-ditor midis ushtrisë sudaneze dhe Forcave të Mbështetjes së Shpejtë u vendos të martën, por që në orët e para armëpushimi u shkel nga të dyja palët e konfliktit. Përleshjet e armatosura në Sudan filluan mëngjesin e së shtunës, më 15 prill, midis forcave të ushtrisë nën komandën e "Abd al-Fattah al-Barhan" dhe forcave të mbështetjes së shpejtë nën komandën e "Mohammed Hamdan Daghlo" me nofkën "Hamidati". Kundërsulmet e ushtrisë sudaneze dhe të forcave të mbështetjes së shpejtë shkaktuan dëme në pronën publike dhe probleme në furnizimin me ujë dhe energji elektrike në disa zona të Khartoumit. Ndërkohë konsultimet për të sjellë të dy palët në tryezën e bisedimeve kanë qenë të pafrytshme.
