SHBA do t'i sigurojë Taipeit armë me vlerë 500 milionë dollarë

Shtetet e Bashkuara po përgatisin një dërgesë të shpejtë të armëve për Tajvanin, pavarësisht paralajmërimeve të përsëritura të Pekinit ndaj Uashingtonit kundër armatosjes së ishullit të vetëqeverisur, të cilin Kina e konsideron si pjesë të territorit të saj.

Administrata e presidentit amerikan Joe Biden do të përdorë Autoritetin Presidencial të Tërheqjes (PDA) për të përshpejtuar dërgimin e armëve në Tajvan, raportoi Bloomberg. Në një raport të premten, duke cituar njerëz të paidentifikuar të njohur me këtë çështje, Bloomberg tha se dërgesa prej 500 milionë dollarësh do të ishte hera e parë që Uashingtoni do të përdorte një mekanizëm të stilit të Ukrainës, autoritet emergjent i cili është përdorur më shumë se 35 herë për të siguruar armë për Ukrainën. PDA autorizon presidentin amerikan të transferojë artikuj dhe shërbime nga rezervat e SHBA-së pa miratimin e Kongresit. Kina ka sovranitet mbi Tajvanin dhe sipas politikës Një Kinë, pothuajse të gjitha vendet e botës e njohin këtë sovranitet. Shtetet e Bashkuara, gjithashtu, e njohin sovranitetin kinez mbi ishullin, por prej kohësh i janë bashkuar Taipeit, duke shkaktuar zemërimin e Pekinit. Pekini ka kritikuar në mënyrë të përsëritur furnizimet me armë dhe marrëdhëniet ushtarake të SHBA-së me Tajvanin. Më herët të premten, zëdhënësja e Ministrisë së Jashtme kineze Mao Ning denoncoi provokimet e SHBA-së në Tajvan dhe akuzoi Uashingtonin se "po e kthen Tajvanin në një fuçi baruti".