Racizmi në futbollin spanjoll
Fyerjet raciste ndaj një lojtari brazilian në ligën spanjolle të futbollit kanë sjellë kritika të forta në mbarë botën.
Agjencia e lajmeve IRNA njoftoi se gjatë ndeshjes së futbollit mes Real Madridit dhe Valencias të dielën mbrëma, Vinícius Júnior, ylli brazilian i Real Madridit, ishte bërë objektiv i ofendimeve raciste nga tifozët e Valencias në stadiumin "Mestalla" në Spanjë.
Sipas videove të regjistruara brenda stadiumit, ofendimet raciste janë përsëritur gjatë ndeshjes. Në një moment gjatë lojës, Vinicius madje hyri në tribunë dhe u përlesh me një tifoz.
Ndeshja nuk u ndërpre nga arbitri dhe lojtari brazilian u përjashtua përfundimisht me karton të kuq direkt për shkak të sjelljes josportive në minutën e 90+7, pasi VAR shqyrtoi skenën e konfliktit.
Vinicius shkroi në llogarinë e tij në Twitter pas ndeshjes: “Racizmi është normal në ligën spanjolle të futbollit. Zyrtarët e La Ligës mendojnë se këto slogane janë diçka normale dhe tifozët inkurajohen të vazhdojnë këtë veprim".
Lojtari 23-vjeçar brazilian shtoi: "Spanja ka pranuar t'i paraqesë botës imazhin e një vendi racist".
Organizata e Ligës Spanjolle të Futbollit deklaroi se ka paraqitur nëntë ankesa të mëparshme për incidente raciste kundër Vinicius në Komisionin Shtetëror kundër Dhunës dhe Racizmit.
Në të njëjtën kohë, presidenti brazilian Lula da Silva shprehu solidaritetin e tij me Vinicius dhe u shpreh optimist se FIFA dhe institucionet e tjera do të marrin masa për të parandaluar ndikimin e racizmit në futboll.
Da Silva theksoi: "Nuk mund të lejojmë që fashizmi dhe racizmi të pushtojnë stadiumet e futbollit".
