Putin: I dhashë Wagnerit mundësinë për të vazhduar shërbimin në Rusi

Vladimir Putin në një intervistë tha se ai u dha rebelëve Wagner mundësinë për të vazhduar jetën e tyre organizative dhe për të shërbyer në Rusi, por Prigozhin refuzoi.

Në një intervistë për Kommersant, presidenti rus Vladimir Putin tha se pesë ditë pasi ushtria e Wagner-it tentoi një grusht shteti, në një takim me dhjetëra anëtarë të këtij grupi kontraktor ushtarak dhe Yevgeny Prigozhin, themeluesin dhe komandantin e tij, u ofroi atyre që të qëndronin dhe shërbenin në Rusi së bashku. Sipas propozimit të Putinit, ushtarët e Wagner-it mund të qëndronin në Rusi dhe të vepronin nën urdhrat e Prigozhin. Kommersant, duke cituar Putinin, për takimin me 35 anëtarë të Wagner dhe Prigozhin në Pallatin e Kremlinit shkruante: Të gjithë ata mund të ishin mbledhur në një vend dhe të vazhdonin shërbimin e tyre. Asgjë nuk do të ndryshonte. Udhëheqësi i tyre mbetet gjatë gjithë kohës ai që ishte udhëheqësi i tyre i vërtetë. Meqenëse Vladimir Putin, si President i Rusisë, konsiderohet komandanti i përgjithshëm, nga deklaratat e tij mund të konkludohet se grupi Wagner duhet të veprojë në kuadrin e ushtrisë ruse. Putin tha: Shumë nga ushtarët e Wagner-it tundën kokën kur thashë këtë, por Prigozhin nuk u pajtua dhe tha: Jo. Këta djem nuk do të pajtohen me një vendim të tillë. Në këtë intervistë ai deklaroi se Wagner nuk mund të vazhdojë të funksionojë më me formën dhe strukturën aktuale dhe shtoi: Wagner nuk ekziston. Nuk ka ligje për organizatat ushtarake private. Ushtarët e Wagner-it luajtën një rol kyç në avancimin e ushtrisë ruse në Ukrainë dhe kapjen e qytetit të Bakhmutit; Por Prigozhin vazhdimisht akuzoi komandantët ushtarakë rusë se nuk i mbështesin njerëzit e tij dhe madje reduktuan furnizimin e Wagner-it me predha artilerie dhe municione të tjera në momentet kyçe të betejës së Bakhmutit. Pas muajsh tensionesh verbale midis Prigozhinit dhe komandantëve të ushtrisë ruse, forcat e Wagnerit më 24 qershor u kthyen nga Ukraina në Rusi dhe morën nën kontroll qytetin jugor Rostov dhe më pas shkuan drejt Moskës. Por vetëm 24 orë pas fillimit të kryengritjes dhe me ndërmjetësimin e presidentit bjellorus Aleksandër Lukashenko, Prigozhin urdhëroi trupat e tij të ndalonin përparimin e tyre drejt Moskës. Çështjet gjyqësore kundër tij u mbyllën dhe në atë kohë u tha se ushtarëve të tij iu dha opsioni që të bashkoheshin me ushtrinë ukrainase ose të shkonin në Bjellorusi bashkë me udhëheqësin e tyre.