Vizitë e papritur e ministrit të Jashtëm japonez në Ukrainë

Në një takim me Presidentin e Ukrainës, ministri i Jashtëm japonez theksoi gatishmërinë e Tokios për të ndihmuar në rindërtimin e ekonomisë së Kievit dhe për të ofruar garanci për sigurinë e këtij vendi.

Ministri i Jashtëm japonez Yoshimasa Hayashi, i cili udhëtoi për në Kiev, u takua dhe u konsultua me presidentin ukrainas Volodymyr Zelensky të shtunën në mbrëmje. Sipas agjencisë së lajmeve Reuters, Ministria e Jashtme japoneze njoftoi se Hayashi dhe Zelensky kishin filluar bisedimet për garancitë e sigurisë dhe dy vendet arritën një marrëveshje për të rindërtuar ekonominë e Ukrainës. Bisedimet Japoni-Ukrainë për garancitë e sigurisë për Kievin vijnë pasi anëtarët e Grupit G7 thanë në korrik se do të fillonin bisedimet me Ukrainën për këtë çështje. Ministri i Jashtëm japonez dhe delegacioni që e shoqëronte u zotuan në emër të sektorit publik dhe privat të Japonisë për të rindërtuar ekonominë e Ukrainë. Sipas Reuters, Japonia planifikon të presë një takim për rindërtimin ekonomik të Ukrainës në fillim të vitit të ardhshëm. Ministri i jashtëm japonez në një bisedë me homologun e tij ukrainas, Dmytro Kuleba, shprehu mbështetjen e fortë të Tokios për Kievin dhe theksoi domosdoshmërinë për t'i dhënë fund agresionit rus me ndihmën e bashkësisë ndërkombëtare. Qeveria japoneze, së bashku me vendet perëndimore, kanë miratuar sanksione të ndryshme për të kufizuar eksportin e mallrave me përdorim të dyfishtë në Moskë me pretekstin e operacioneve speciale ushtarake të Rusisë në rajonin e Donbasit.