Talibanët arrestojnë 18 punonjës të OJQ-ve, përfshirë një grua amerikane
Autoritetet talibane të Afganistanit kanë arrestuar 18 anëtarë të stafit të një organizate joqeveritare (OJQ), duke përfshirë një grua amerikane, me akuzën e përfshirjes në punën misionare të krishterë në vend, tha grupi Taliban të shtunën.
"U morën dokumente dhe audio që tregonin se ata po ftonin njerëzit të bashkoheshin me krishterimin," tha një zëdhënës i qeverisë Abdul Wahid Hamas Ghori, duke iu referuar punonjësve të OJQ-së të regjistruar në Zvicër. Ai tha se forcat e sigurisë dhe të inteligjencës kishin vëzhguar grupin për disa kohë. Misioni Ndërkombëtar i Asistencës (IAM) konfirmoi se stafi i tij u mor në dy raste të veçanta këtë muaj nga zyra e OJQ-së në provincën Ghor, Afganistani qendror, dhe u dërguan në kryeqytetin Kabul. Misioni tha në një deklaratë më herët se 18 persona, duke përfshirë një "të huaj", po mbaheshin dhe se nuk kishte asnjë informacion për natyrën e akuzave. OJQ-ja tha se organizata nuk ofron ndihmë sipas bindjeve politike apo fetare. "Ne vlerësojmë dhe respektojmë zakonet dhe kulturat lokale," tha Misioni Ndërkombëtar i Asistencës. Komisioneri i Lartë i Kombeve të Bashkuara për të Drejtat e Njeriut Volker Turk ka paralajmëruar së fundmi për një sulm sistematik ndaj lirisë së popullit të Afganistanit. Ai i tha Këshillit të të Drejtave të Njeriut në Gjenevë, se "të drejtat e njeriut në Afganistan janë në një gjendje kolapsi, duke ndikuar në mënyrë akute në jetën e miliona grave, burrave, vajzave dhe djemve".
