Blinken mision të ri diplomatik në Lindjen e Mesme
Sekretari amerikan i Shtetit, Antony Blinken, filloi misionin e tij më të fundit urgjent diplomatik në Lindjen e Mesme të shtunën në Turqi, ndërsa shtohet frika se lufta e Izraelit kundër Hamasit në Gaza mund të kthehet në një konflikt më të gjerë.
Vizita e katërt e Blinkenit në tre muaj vjen mes zhvillimeve shqetësuese jashtë Gazës, përfshirë Libanin, Izraelin verior, Detin e Kuq dhe Irakun.
Sekretari Blinken u takua me presidentin turk Rexhep Tajip Erdogan dhe ministrin e Jashtëm Hakan Fidan për të diskutuar për ndikimin që mund të ushtrojë Turqia për të lehtësuar tensionet në rritje, për të përshpejtuar dërgesat e ndihmave humanitare në Gazë dhe për të filluar planifikimin për rindërtimin dhe qeverisjen e Gazës së pasluftës. Pjesa më e madhe e territorit është kthyer në gërmadha nga tre muaj bombardime intensive izraelite.
Presidenti Erdogan, është një kritik i ashpër i krimeve të Izraelit në Gaza. Ndryshe nga SHBA, Turqia nuk e konsideron Hamasin si një grup terrorist.
Pas Turqisë, Blinken do të shkojë në ishullin e Kretës për të takuar kryeministrin grek Kyriakos Mitsotakis. Greqia, anëtare e NATO-s, është në pritje të miratimit nga Kongresi i SHBA-së të një shitjeje avionësh luftarakë F-35.
Në ditët në vazhdim, sekretari amerikan i shtetit do të vizitojë vende arabe, Izraelin dhe Bregun Perëndimor, ku do të përcjellë mesazhin se Uashingtoni nuk dëshiron një përshkallëzim rajonal të konfliktit të Gazës.
