Pekini: NATO një makinë luftarake që shkakton kaos kudo që shkon

Një zëdhënës kinez i mbrojtjes e quajti NATO-n një makinë luftarake që shkakton kaos kudo që shkon, sipas një raporti të botuar në faqen e internetit Newsweek.

Wu Qian i bëri komentet në një konferencë shtypi në Pekin në përgjigje të pyetjeve të mediave në lidhje me stërvitjen ushtarake të NATO-s.

NATO, si një organizatë ushtarake rajonale, që nga themelimi i saj ka iniciuar dhe marrë pjesë në konfliktet globale, tha Wu Qian, duke shtuar se në vitet e fundit, NATO është zgjeruar vazhdimisht drejt rajonit të Azisë-Paqësorit, duke përdorur diskursin e pabazuar të "kërcënimit të Kinës" si një pretekst për konfrontim midis blloqeve dhe përbën një kërcënim për sigurinë rajonale.

Zëdhënësi ushtarak kinez gjithashtu i kërkoi NATO-s që të ndalojë fabrikimin e gënjeshtrave dhe marrjen e masave të rrezikshme që shkaktojnë kaos në rajonin e Azi-Paqësorit, të trajtojë Kinën dhe zhvillimin e forcave të armatosura të Kinës në mënyrë objektive dhe racionale, dhe të bëjë diçka të dobishme për paqen botërore.

NATO fokusohet kryesisht në çështjet që kanë të bëjnë me Evropën dhe Amerikën e Veriut. Megjithatë, në vitet e fundit aleanca i ka kthyer gjithnjë e më shumë vështrimet e saj drejt Azisë për shkak të kërcënimeve të perceptuara rajonale nga Kina dhe marrëdhënieve të ngrohta midis Pekinit dhe Moskës, shkroi Newsweek.