Arrestohen 400 persona në trazirat në Britani
Gati 400 persona janë arrestuar pas gjashtë ditësh trazirash në disa pjesë të Anglisë dhe Irlandës së Veriut.
Policia britanike u sulmua në Plymouth teksa u përpoq të mbante të ndarë protestuesit rivalë. Bomba me benzinë u hodhën mbi oficerët në Belfast dhe policia u përball me trazirat në lindje të Birminghamit.
Gjatë javës së kaluar dhjetëra oficerë policie u plagosën dhe dyqane, makina dhe shtëpi u dëmtuan në Britani.
Trazirat në Belfast, Plymouth dhe Birmingham erdhën pas një dite në të cilën disa nga personat e arrestuar që janë akuzuar në lidhje me trazirat u shfaqën në gjykata në të gjithë Mbretërinë e Bashkuar.
400 arrestime janë bërë nga radhët e pjesëmarrësve nga grupet e ekstremit të djathtë dhe anti-emigracion. Kryeministri britanik Keir Starmer, pa dhënë shumë detaje, njoftoi për një “ ushtri në gatishmëri” të punonjësve të specializuar të Policisë, për t’u përballur me dhunën nëpër rrugët e sheshet e qyteteve britanike.