Guler: Afrimi Ankara-Damask është në interes të të dy vendeve
Ministri turk i Mbrojtjes Yasar Guler shprehu kënaqësinë për procesin e afrimit dhe rivendosjes së marrëdhënieve diplomatike me Sirinë, duke thënë se normalizimi i shpejtë i marrëdhënieve të ndërsjella është në interes të të dy vendeve fqinje.
Të shtunën, Guler kujtoi deklaratën e presidentit turk Rexhep Tajip Erdogan mbi gatishmërinë e tij për t'u takuar me homologun e tij sirian Bashar al-Assad, duke vënë në dukje se Damasku e pranoi pozitivisht nismën e Ankarasë.
Ai i përshkroi gjithashtu si "plotësisht pozitive" deklaratat e fundit të presidentit sirian se afrimi me Turqinë kërkon respekt të ndërsjellë për sovranitetin dhe një angazhim të vërtetë për të trajtuar shkaqet rrënjësore të tensioneve në marrëdhëniet dypalëshe midis Damaskut dhe Ankarasë.
“Nuk mendoj se ka një problem të pakapërcyeshëm mes nesh. Pasi të kemi zgjidhur problemet tona, ne mund të vazhdojmë aktivitetet tona normale si vende fqinje. Zgjidhja e konfliktit do të jetë në interes të të dyja palëve”, tha Guler.
Duke folur në Asamblenë Popullore të Sirisë, më 25 gusht, Presidenti Bashar al-Assad tha: "Që të ndodhë çdo normalizim i marrëdhënieve, Turqia duhet të ndryshojë politikat që çuan në situatën aktuale, duke përfshirë tërheqjen e forcave turke nga Siria dhe ndërprerjen e mbështetjes për grupet terroriste".
