“Menaxhonte rrjetin financiar të Mossad-it në Turqi”, arrestohet shtetasi kosovar
Shtetasi i Kosovës Liridon Rexhepi, i identifikuar si kreu i rrjetit financiar të Mossad-it në Turqi është arrestuar nga Organizata Kombëtare e Inteligjencës e Turqisë (MIT).
Siç kanë raportuar mediat turke, Liridon Rexhepi, u arrestua nga Departamenti i Antiterrorit i Policisë së Stambollit.
Po sipas mediave turke, të cilat thonë se janë bazuar në informacionet e marra nga burimet e sigurisë, Rexhepi ka menaxhuar rrjetin financiar të Mossad-it në Turqi.
Rexhepi, është përcaktuar se ka kryer incizime me dron dhe aktivitete operative psikologjike kundër politikanëve palestinezë me udhëzimet e Shërbimit izraelit të inteligjencës.
Ai thuhet se ka transferuar para për personelin e Mossad-it në Turqi që përpilonin informacione lidhur me Sirinë.
MIT ka përcaktuar se të gjitha lëvizjet e Rexhepit, veçanërisht lëvizjet e dyshimta në llogaritë e tij, janë monitoruar dhe ai ka bërë transferta të shumta parash për personelin e Mossad-it në terren në Turqi.
Aktivitetet e tij janë monitoruar nga 25 gushti kur ai ka hyrë në Turqi.
Si rezultat i punës së koordinuar midis MIT-it dhe Departamentit të Antiterrorit të Policisë së Stambollit, Rexhepi është ndaluar më 30 gusht.
Rexhepi në deklaratën e tij në polici pranoi se ka transferuar para, ndërsa me urdhër të gjykatës u arrestua.