Krishtlindje të përgjakura në Ukrainë

Në ditën e Krishtlindjes, Rusia shënjestroi infrastrukturën e Ukrainës nëpërmjet sulmeve të rënda me raketa dhe dronë.

Sipas rrjetit të lajmeve Euronews, të mërkurën Rusia kreu një sulm masiv me raketa dhe dronë kundër infrastrukturës energjetike të Ukrainës dhe sulmoi një termocentral. Këto sulme bënë që ukrainasit të kërkonin strehim në stacionet e metrosë në mëngjesin e Krishtlindjes.

Presidenti i Ukrainës, Volodymyr Zelensky, ka shkruar në lidhje me këtë në rrjetin social X: “Putini zgjodhi qëllimisht Krishtlindjet për këtë sulm. Çfarë mund të jetë më çnjerëzore se kjo?! Ata ende po përpiqen të krijojnë një ndërprerje energjetike në Ukrainë."

Zelensky shtoi: "Më shumë se 70 raketa, duke përfshirë raketa balistike, dhe më shumë se njëqind dronë janë përdorur në sulmin ndaj infrastrukturës energjetike të Ukrainës."

Sipas agjencisë CBS News, sulmet ruse goditën termocentralin e Ukrainës me një breshëri raketash, duke dërguar qytetarët ukrainas në strehimore në mëngjesin e Krishtlindjeve.

Ministri i Energjisë i Ukrainës njoftoi të mërkurën se një ndërprerje e gjerë e energjisë elektrike ka goditur vendin pas një raundi të ri sulmesh me dronë dhe raketa ruse kundër infrastrukturës energjetike në të gjithë Ukrainën nga mbrëmja e kaluar deri në mëngjesin e Krishtlindjes.

Forcat Ajrore të Ukrainës thanë gjithashtu se disa raketa u lëshuan në rajonet Kharkiv, Dnipro dhe Poltava në lindje të vendit.

Këtë e ka bërë të ditur në Telegram, zëvendëskryeministri i Ukrainës, Oleksiy Koliba, i cili ka shtuar se si pasojë e këtyre sulmeve është ndërprerë ngrohja e 155 objekteve të banimit. Ai tha gjithashtu se 500,000 njerëz në rajonin Kharkiv janë pa pajisje ngrohjeje.