Zhvillimet midis Indisë dhe Pakistanit | Tensionet në nënkontinent arritën kulmin

ParsToday - Tensionet midis Indisë dhe Pakistanit kanë arritur kulmin pas sulmeve me raketa të Indisë në zonat e Kashmirit të kontrolluar nga Pakistani.

Sipas ParsToday, tensionet ushtarake midis Indisë dhe Pakistanit, dy fuqive bërthamore të nënkontinentit, kanë arritur nivele të papara pas sulmeve me raketa të Indisë në zonat e Kashmirit të kontrolluar nga Pakistani. Luftime këto të cilat rrjedhin nga sulmi terrorist i javës së kaluar në rajonin Pahalgam të Kashmirit të kontrolluar nga India, e kanë sjellë rajonin në prag të një krize të plotë.

Qeveria indiane pretendon të martën se ka shënjestruar nëntë baza terroriste në Kashmirin pakistanez me sulme raketore në një operacion të koduar "Sindoor". Ushtria indiane i përshkroi sulmet si "të sakta" dhe në përputhje me ndjekjen e drejtësisë, dhe ambasada e Indisë në Shtetet e Bashkuara të Amerikës theksoi se "asnjë objektiv civil ose ushtarak në Pakistan nuk ishte në shënjestër gjatë këtyre sulmeve". Por Pakistani i ka quajtur këto pretendime "të pabaza" dhe i ka konsideruar sulmet një shkelje të qartë të sovranitetit të tij.

Sulm në 6 lokacione në Pakistan

Zëdhënësi i ushtrisë së Pakistanit njoftoi se sulmet indiane në gjashtë lokacione në vend, përfshirë një digë në Kashmir, rezultuan në vrasjen e 26 civilëve dhe plagosjen e 46 të tjerëve.

Ministri pakistanez i Mbrojtjes, Khaxhe Muhammad Asif, duke hedhur poshtë akuzat e Indisë për ekzistencën e bazave terroriste, theksoi se kundërpërgjigja ndaj këtij agresioni do të vazhdojë.

Në Këshillin e Sigurimit

Pakistani, një anëtar jo i përhershëm i Këshillit të Sigurimit, e informoi Këshillin e Sigurimit, duke e quajtur sulmin e Indisë një kërcënim për paqen botërore dhe duke deklaruar se rezervon të drejtën e vetëmbrojtjes në përputhje me Nenin 51 të Kartës së OKB-së. Islamabadi thirri gjithashtu të ngarkuarin me punë indian dhe paraqiti një protestë të fortë. Presidenti dhe kryeministri i Pakistanit dënuan gjithashtu veprimet e Indisë dhe theksuan vazhdimin e kundërpërgjigjës.

5 avionë luftarakë indianë u rrëzuan

Pas tensioneve midis Nju Delhit dhe Islamabadit, Forcat Ajrore Pakistaneze kanë pretenduar se kanë rrëzuar pesë avionë luftarakë indianë dhe kanë shkatërruar një bazë ushtarake indiane. Ndërsa ushtria indiane nuk i ka konfirmuar pretendimet e Pakistanit se avionët e saj luftarakë u rrëzuan, burime pakistaneze kanë raportuar kapjen e disa ushtarëve indianë.

Gatishmëria e mbrojtjes ajrore indiane

Nga ana tjetër, India ka vënë në gatishmëri të gjitha sistemet e saj të mbrojtjes ajrore përgjatë kufirit me Pakistanin dhe ka pasur raportime për shkëmbim zjarri me artileri përtej Vijës së Kontrollit.

Thirrje për vetëpërmbajtje

Ndërkohë, sekretari i Përgjithshëm i OKB-së, Antonio Guterres, shprehu shqetësim për këto përleshje, dhe u bëri thirrje të dyja palëve të tregojnë vetëpërmbajtje dhe paralajmëroi se bota nuk mund të shikojë një përballje ushtarake midis këtyre dy fuqive bërthamore. Komuniteti ndërkombëtar po i ndjek gjithashtu zhvillimet me shqetësim, pasi përshkallëzimi i tensioneve mund të ketë pasoja katastrofike për rajonin dhe botën.