Ministri i jashtëm francez viziton Moskën

Ministri i jashtëm francez Jean Marc Ayrault, do të udhëtojë nesër për në Moskë, ku do të takohet me homologun e tij rus Sergei Lavrov, me të cilin do të diskutojë çështje të marrëdhënieve dypalëshe si dhe krizat rajonale, si kriza në Ukrainë dhe Siri.

Takimi Lavrov-Ayrault zhvillohet në kushtet kur Rusia sapo ka kundërshtuar propozimin francez në OKB për vendosjen e një armëpushimi në Alepo dhe ka deklaruar se prioritet në Siri duhet të jetë lufta kundër grupeve terroriste. Moska ka deklaruar se përpjekjet e vendeve perëndimore e sidomos të Amerikës për vendosjen e armëpushimit në Siri, nuk janë të sinqerta dhe në vend që të synojnë zgjidhjen e krizës siriane, kanë për qëllim riorganizimin dhe furnizimin e grupeve terroriste.