Erdogan reagon me zemërim të thellë kundër denigrimit të Kur'anit

Presidenti i Turqisë, Rexhep Tajip Erdogan, reagoi me zemërim ndaj një grupi prej rreth 300 personaliteteve franceze, që u bënë thirrje myslimanëve të denoncojnë referencat 'anti-hebraike' dhe 'anti-krishtere' në Kur'an.

Duke iu adresuar një takimi të partisë së tij të martën, Erdogan e përshkroi grupin, që përfshin aktorin Gerard Depardieu, këngëtarin Charles Aznavour dhe ish-presidentin, Nicolas Sarkozy, si "të neveritshëm" dhe tha se ai po i sulmon "shkrimet e shenjta për myslimanët". Grupi nënshkroi një manifest që u botua në gazetën Le Parisien, muajin e kaluar. Deklarata u bën thirrje myslimanëve t'i denoncojnë disa referenca, në mënyrë që "asnjë besimtar të mos i referohet librit të shenjtë për të kryer një krim". Erdogan tha se librat e tjerë të shenjtë kanë referenca të diskutueshme. "Po ta kishin lexuar, ndoshta do të kërkonin që Bibla të ndalohej, por ata nuk kanë shqetësime të tilla", tha Erdogan.