Arabia Saudite drejtohet nga Lindja për raketa, alarmohet SHBA

Ekspertët amerikanë të mbrojtjes thonë se Arabia Saudite po ndjek një program raketash me ndihmën e Kinës dhe Pakistanit, në një divergjencë të dukshme me SHBA dhe zhvendosja e politikave saudite drejt Lindjes mund të ngrejë shqetësime në Uashington.

Javën e kaluar, The Washington Post raportoi se Arabia Saudite ka filluar ndërtimin e fabrikës së parë të raketave balistike. Imazhet satelitore të marra në nëntor nga kompania amerikane Planet Labs Inc dhe analizuar nga Instituti i Studimeve Ndërkombëtare në Middlebury në Monterey zbuluan se fabrika ndodhet në një bazë ekzistuese të raketave pranë qytetit qendror saudit al-Watah. Ekspertët e mbrojtjes amerikane thanë për CNBC se zhvillimi tregon një dëshirë në rritje nga Riadi, aleat i vjetër i Uashingtonit, për të marrë masa ofensive pa miratimin e sponsorit kryesor të armëve të tij. "Ekziston një garë armatimi në proces", tha Michael Rubin, një ish-zyrtar i Pentagonit dhe ekspert i çështjeve arabe në Institutin e Ndërmarrjes Amerikane. "Ndryshimet e politikave në Uashington kanë pasur ndikimin e tyre në Riad: autoritetet saudite nuk do të kufizohen më nga pëshpëritjet e Shtëpisë së Bardhë. Sauditët po tregojnë se mund t'i marrin gjërat në duart e tyre", shtoi ai. Eksperti i raketave Jeffrey Lewis gjithashtu theksoi se investimi i rëndë në raketa shpesh lidhet me një interes në armët bërthamore, duke shtuar: "Do të isha pak i shqetësuar se ne po nënvlerësojmë ambiciet e Arabisë Saudite në këtë sektor". Riadi filloi programin e tij të raketave, i cili mbikëqyret nga forcat sekrete të raketave strategjike të Mbretërisë (SRF), me blerjen e raketave balistike kineze D3-F Silkworm në vitin 1988. Duke folur në kushtet e anonimitetit, një ish-zyrtar i Pentagonit tha se SRF ka gjasa të "operojë me të dhëna kineze", duke vënë në dukje se "duke pasur parasysh se Pakistani ka lidhje të ngushta me Kinën dhe me Arabinë Saudite dhe se ka shumë këshilltarë që punojnë me agjencitë e sigurisë saudite, nuk do të befasohemi nëse do të ketë ndihmë pakistaneze në programin raketor saudit ". Analistët besojnë se zbulimet rreth programit të raketave të Arabisë Saudite mund të ndërlikojnë më tej marrëdhëniet e mbretërisë me SHBA-të, duke pasur parasysh zemërimin e rritur në lidhje me luftën vdekjeprurëse të Riadit ndaj Jemenit dhe vrasjen e gazetarit disident saudit Jamal Khashoggi në tetor 2018. Përveç aktiviteteve të raketave balistike, sauditët po ndjekin gjithashtu një program të energjisë bërthamore.