Makron i pakënaqur nga mos zgjedhja e kreut të Komisionit Evropian
Presidenti Francez është shprehur i pakënaqur nga mos zgjedhja e kreut të Komisionit Evropian dhe ka kërcënuar se do të pengojë zgjerimin e Bashkimit Evropian.
Ndërkohë që Shqipëria dhe Maqedonia e Veriut presin që në tetor të marrin më në fund dritën jeshile për hapjen e negociatave me Bashkimin Evropian, sinjalet që vijnë nga Franca janë shumë pesimiste. Presidenti Emmanuel Macron është shprehur i vendosur për të bllokuar çdo zgjerim të BE-së derisa të realizohen reformat e thella brenda unionit. Pas samitit të zhvilluar sot në Bruksel, Macron tha: “Unë do të refuzoj çdo lloj zgjerimi përpara se të arrihet një reformim i thellë funksionimit tonë institucional.” BE ka hyrë në ngërç pas zgjedhjeve të Parlamentit Evropian, pasi drejtuesit e 28 shteteve anëtare po dështojnë të zgjedhin liderët që do të drejtojnë unionin për pesë vitet e ardhshme. Franca dhe Holanda janë dy shtetet që po bllokojnë hapjen e negociatave për Tiranën dhe Shkupin, ndërkohë që Gjermania është shprehur në favor të dy shteteve ballkanike.