Trump redukton fondet për OBSH
Donald Trump pritet të reduktojë fondet amerikane për Organizatën Botërore të Shëndetësisë me 90% për të kontribuar të njëjtën shumë me Kinën.
Në një letër zyrtare të zbuluar nga mediat, presidenti tha se kontributi i përvitshëm i SHBA për agjencinë e shëndetit të OKB do të jetë vetëm $40 milionë. Më parë SHBA jepte rreth $400 milionë në vit për OBSH, shumë më tepër se çdo vend tjetër, shifër kjo e kritikuar shpesh nga Trump. Ai ka akuzuar organizatën se mbron Kinën, edhe pse kjo e fundit sipas tij ka fshehur shifrat e vërteta të koronavirusit në vend, duke bërë që vende të tjera mos merrnin masat e duhura. Letra e Trump u publikua nga rrjeti Fox News dhe thoshte se presidenti “pranon të paguajë deri aq sa paguan Kina”. Aty thuhet më tej: “Megjithë mangësitë e saj, unë besoj se OBSH ka një potencial të madh dhe dua që agjencia ta arrijë këtë potencial, veçanërisht në lidhje me krizën e re globale. Prandaj kam vendosur që SHBA do të vazhdojnë partneritetin, por Kina ka një borxh të madh me botën dhe duhet të paguajë pjesën e saj të plotë në OBSH. Nëse Kina rrit kontributet e saj në OBSH, ne do të përpiqemi t’i përshtatemi atyre”. OBSH ka mohuar se mban anën e Kinës dhe sekretari i saj Dr Michael Ryan ka vlerësuar ‘transparencën’ e vendit në lidhje me epideminë.
