Эрон бузургтарин содиркунандаи хурмо дар ҷаҳон аст

Порс Тудей - Узви гурӯҳи кории Ҷадвали миллии хурмои Эрон гуфт: Эрон бузургтарин содиркунандаи ин маҳсулот дар ҷаҳон аст, ки истеҳсоли солонаи он якуним миллион тонна хурмо, масоҳати кишт беш аз 300 ҳазор гектар ва содироти он 430 ҳазор тоннаро ташкил медиҳад.

Ба гузориши Порс Тудей, Абулқосим Муҳаммадзода, узви гурӯҳи кории Ҷадвали миллии хурмои Эрон, рӯзи панҷшанбе дар ҷаласаи Ҷадвали миллии хурмо дар Бушеҳр дар ҷануби Эрон изҳор дошт: Миср, Арабистони Саудӣ, Эрон, Алҷазоир, Покистон, Ироқ, Судон, Имороти Муттаҳидаи Араб, Умон ва Тунис 10 кишвари пешсафи истеҳсолкунандаи хурмо дар ҷаҳон ҳастанд ва Эрон бо истеҳсоли солонаи якуним миллион тонна хурмо дар байни се кишвари пешсаф қарор дорад.

Ӯ қайд кард: Эрон бо содироти солонаи 430 ҳазор тонна хурмо бузургтарин содиркунандаи ҷаҳон аст, пас аз он Арабистони Саудӣ бо 390 ҳазор тонна ва Имороти Муттаҳидаи Араб бо 330 ҳазор тонна қарор доранд. Арзиши содироти хурмои Эрон тақрибан 430 миллион доллар арзёбӣ мешавад.

Муҳаммадзода изҳор дошт, ки бозорҳои содиротии Эрон Ҳиндустон, Покистон, Туркия, Имороти Муттаҳидаи Араб, Афғонистон, Қазоқистон, Чин, Ироқ ва Русияро дар бар мегиранд ва афзуд: Навъҳои хурмои содиротии Эрон Мазафатӣ, Кабкаб, Шоҳонӣ, Зоҳидӣ, Рабӣ, Хасуӣ ва Пиаромро дар бар мегиранд.

Узви Гурӯҳи кории миллии хурмо дар бораи вазъи ҷаҳонии хурмо изҳор дошт: Дар ҷаҳон солона тақрибан 9 миллион тонна хурмо истеҳсол мешавад, ки аз он ҳафт миллион тонна дар кишварҳои истеҳсолкунанда истеъмол мешавад ва танҳо ду миллион тонна дар тиҷорати ҷаҳонӣ тиҷорат мешавад.