Azərbaycan–Rusiya münasibətlərində yeni “geri dönüşü olmayan” mərhələ

Qəzetin yazdığına görə, Rusiyanın üç siyasi jurnalisti Azərbaycan Baş Prokurorluğunun müraciəti əsasında “terrorçuluğa çağırış, ölkənin ərazi bütövlüyünün pozulması və etnik nifrətin qızışdırılması” ittihamları ilə qiyabi mühakimə olunub.

“Pars Today”in məlumatına görə, Moskvada nəşr olunan “Pravda” qəzeti bu barədə yazıb ki, Bakı prokurorluğunun bir sıra rusiyalı ekspertlər barəsində beynəlxalq təqib prosesinə başlamaqla bağlı son qərarı iki ölkə arasındakı münasibətlərdə yeni, “geri dönüşü olmayan” mərhələ yaradıb.

Məlumata əsasən, politoloq Semyon Uralov, “Moskva 24” telekanalının aparıcısı İvan Knyazev və Rusiyanın nəqliyyat nazirinin müşaviri Aleksey Çadayev İnterpolun axtarış siyahısına salınıb.

Moskvada nəşr olunan “Nezavisimaya qazeta” da yazıb ki, Azərbaycan Xarici İşlər Nazirliyi Rusiyanın Bakıdakı səfiri Mixail Yevdokimovu XİN-ə çağırıb.

Məlumata görə, Bakı son günlər Rusiya mediasında yayımlanan tənqidi materiallarla bağlı rusiyalı diplomata kəskin etirazını bildirib.

Azərbaycan Xarici İşlər Nazirliyi bəyan edib: “Rusiya mediasında və informasiya məkanında son vaxtlar Azərbaycan Respublikasına, onun xalqına və rəhbərliyinə qarşı yayılan təxribatçı, təhqiramiz və hədələyici bəyanatlarla bağlı ciddi narahatlıqlar Rusiya tərəfinə çatdırılıb.”

Rusiyanın bu nəşrinin yazdığına görə, Azərbaycanın reaksiyası ilk növbədə Semyon Uralovun “YouTube” kanalında yayımlanan verilişlə bağlıdır. Belə ki, həmin proqramda Uralov, İvan Knyazev və Aleksey Çadayev Azərbaycanın Ukraynaya göstərdiyi dəstəyi tənqid ediblər.

Bakı məhkəməsinin yeni qərarı ilə axtarışa verilən şəxslərdən biri olan Çadayev isə etnik nifrəti qızışdırmaq ittihamını rədd edib.

O bildirib ki, azərbaycanlılara qarşı həmişə müsbət münasibəti olub və onlar haqqında heç vaxt mənfi fikir səsləndirməyib. Bununla yanaşı, Çadayev Azərbaycan Prezidenti İlham Əliyev barədə fikirlərini istənilən formatda müzakirə etməyə hazır olduğunu deyib.

Rusiyanın bu mediasının məlumatına görə, Rusiya ilə Azərbaycan arasındakı münasibətlər 2024-cü ilin dekabrında, Azərbaycan Hava Yollarına məxsus sərnişin təyyarəsinin qəzaya uğramasından sonra pisləşməyə başlayıb. Təyyarədə 67 nəfər olub və onlardan 38-i həyatını itirib.

Hadisədən sonra Rusiyada 2000-ci illərin əvvəllərində törədilmiş cinayətlərdə ittiham olunan bir neçə Azərbaycan vətəndaşı saxlanılıb. Bundan sonra isə **“Sputnik”**in jurnalistləri İqor Kartavıx və Yevgeni Belousov, eləcə də daha 11 Rusiya vətəndaşı Azərbaycanda həbs edilib.

Bu jurnalistlər 2025-ci ilin oktyabrında Rusiya Prezidenti Vladimir Putinlə Azərbaycan Prezidenti İlham Əliyev arasında keçirilən danışıqlardan sonra azadlığa buraxılıblar.

Həmin vaxt Rusiya Prezidenti bildirib ki, Azərbaycan sərnişin təyyarəsi Rusiya hava hücumundan müdafiə qüvvələrinin Ukrayna PUA-larına qarşı apardığı əməliyyat nəticəsində vurulub və nəticədə qəzaya uğrayıb. Buna baxmayaraq, 2026-cı ilin mayında saxlanılan üç Rusiya vətəndaşı çirkli pulların yuyulması ittihamı ilə 3 ildən 4 ilədək müddətə azadlıqdan məhrum edilib.

Rusiyanın bu qəzeti daha sonra yazıb ki, Azərbaycan rəsmiləri açıq şəkildə Ukraynanı dəstəkləyirlər. Məsələn, 2026-cı ilin aprelində Ukrayna Prezidenti Volodimir Zelenski Azərbaycan–Rusiya sərhədi yaxınlığında yerləşən İlham Əliyevin iqamətgahına səfər edib. Burada İlham Əliyev Bakı ilə Kiyev arasında strateji əməkdaşlığın davam etdirildiyini bəyan edib və hərbi silahların istehsalı sahəsində əməkdaşlıq təklifini irəli sürüb.