İranın Kabuldakı səfirinin müavininin son açıqlamalarını alqışladı

Əfqanıstan Taliban hökumətinin sözçüsü Zəbihullah Mücahid İran İslam Respublikasının Əfqanıstandakı səfirinin müavini Seyid Həsən Mürtəzəvinin son açıqlamalarını alqışlayıb və vurğulayıb ki, Kabil də İranın müstəqilliyinə və daxili işlərinə hörmətlə yanaşır.

İran İslam Respublikasının Əfqanıstandakı səfirinin müavini Seyid Həsən Mürtəzəvinin açıqlamalarına Zəbihullah Mücahiddən dəstək

İran İslam Respublikasının Əfqanıstandakı səfirliyinin müavini Seyid Həsən Mürtəzəvi iki gün əvvəl Əfqanıstan futzalının qəhrəmanlarının təltif edilməsi mərasimində bildirib ki, İran müsəlmanlar arasında ixtilaf yaratmaq məqsədilə heç bir qrupu dəstəkləmir və hesab edir ki, Əfqanıstanın gələcəyi dialoq, qarşılıqlı anlaşma və əfqanların birgə iştirakı yolu ilə müəyyən edilməlidir.

Əfqanıstan Taliban hökumətinin sözçüsü Zəbihullah Mücahid bu açıqlamalara münasibət bildirərək İranın puştu dilində yayımlanan radiosuna xüsusi müsahibəsində deyib:

«Millətlər arasında etimad və inam mühiti o zaman yaranır ki, ölkələr həqiqətən də digər ölkələrin daxili işlərinə müdaxilə etməsinlər. Səfir müavini cənab Mürtəzəvinin açıqlamaları təqdirəlayiq idi. Onlar Əfqanıstanla bağlı yaxşı mövqe nümayiş etdirdilər və ümid edirik ki, bu mövqe əsas istiqamətlərdə daim qorunub saxlanılacaq.»

Mücahid əlavə edib ki, Əfqanıstan da qardaş ölkə İranın müstəqilliyinə və daxili işlərinə hörmətlə yanaşır, bu ölkədə sülh, təhlükəsizlik və sabitliyin təmin olunmasını istəyir və bu istiqamətdə əməkdaşlıq edir.

O, İran səfirinin müavininin digər açıqlamalarını da təsdiqləyərək bildirib ki, müsəlmanlar arasında ixtilaflara, qeyri-sabitliyə və təhlükəsizliyin pozulmasına qarşı açıq mövqe nümayiş etdirilməsi müsbət yanaşmadır. Onun sözlərinə görə, İslam dünyası yalnız öz daxilində fikir ayrılıqları olmadığı zaman uğur qazana bilər.

İranın Əfqanıstandakı səfirinin müavini Seyid Həsən Mürtəzəvinin Əfqanıstanın gələcək taleyinin bu ölkənin xalqına aid olması barədə açıqlamasına münasibət bildirən Zəbihullah Mücahid deyib:

«Şübhəsiz ki, hər bir ölkənin gələcəyi həmin ölkənin xalqına aiddir. Biz İran İslam Respublikasından gözləyirdik və gözləyirik ki, Əfqanıstan xalqının maraqlarına, hüquqlarına və müstəqilliyinə hörmət etsin. İslam Əmirliyi də eyni mövqedədir və ümid edirik ki, bu mövqe davamlı olacaq, iki ölkə xalqları arasında uzunmüddətli münasibətlərin və dostluğun qurulmasına zəmin yaradacaq.»

İranın Əfqanıstandakı səfirinin müavini bundan əvvəl də bildirmişdi ki, İran həmişə Əfqanıstanın bütün siyasi və ictimai cərəyanlarını birlik, həmrəylik və milli birliyin qorunmasına təşviq edib.