مقام تاجیک: تاجیکستان توان پذیرش موج جدید پناهندگان افغان را ندارد

وزیر داخله تاجیکستان گفت: کشورش از هیچ سازمان بین المللی برای ایجاد زیرساختهای لازم به منظور پذیرش پناهندگان کمک دریافت نکرده است و توان لازم را برای پذیرش موج جدید مهاجران افغانستانی ندارد.

به گزارش رادیو دری ، «رمضان رحیم زاده» در ملاقات با «مولگوت زودی» رئیس دفتر نمایندگی کمیساریای عالی پناهندگان سازمان ملل متحد در تاجیکستان افزود : تنها در 15 سال گذشته این کشور بیش از 15 هزار پناهنده از افغانستان را پذیرفته است.

وی اظهار کرد: هم اینک در خط مرزی این کشور و افغانستان حدود 80 خانواده افغان برای عبور از مرز و ورود به تاجیکستان تجمع کرده اند.

رحیم زاده در عین حال افزود:  با این وجود، دولت تاجیکستان برای پذیرش و اسکان پناهندگان احتمالی افغان در مناطق «جیحون»، «شهر طوس»، «فرخار»، «شاهین» و «بدخشان» 70 هکتار زمین اختصاص داده است، ولی سازمان‌های بین المللی به درخواست‌های دولت مبنی بر کمک به ایجاد زیرساخت‌های لازم در این زمین ها پاسخ نمی‌دهند.

وزیر داخله تاجیکستان همچنین  تاکید کرد که تشدید بی ثباتی در افغانستان پس از به قدرت رسیدن طالبان، احتمال نفوذ تروریست‌ها، اسلحه، مهمات و مواد مخدر به تاجیکستان را افزایش می‌دهد. 

تاجیکستان برای به رسمیت شناختن دولت آینده افغانستان شرط گذاشت