برگزاری نشست امنیتی هرات در تاجیکستان

دهمین نشست امنیتی هرات با عنوان «نظام سیاسی فراگیر؛ الگوها و نقشه راه» در شهر دوشنبه، پایتخت تاجیکستان، آغاز شد.

به گزارش رادیو دری، در این نشست که برای دو روز ادامه خواهد داشت، نزدیک به ۲۰۰ تن از کشورهای مختلف اشتراک دارند.

این نشست با محوریت «نظام سیاسی فراگیر؛ الگوها و نقشه راه» در حال برگزاری است.

یکی از مقام‌های تاجیکستان در سخنرانی افتتاحیه نشست امنیتی هرات گفت که میزبانی آنان از نشست امنیتی هرات و برگزاری آن در کتابخانه مرکزی تاجیکستان نشانه سیاست صلح‌جویانه این کشور در رابطه به افغانستان است.

به گفته او سیاست تاجیکستان حمایت از ایجاد یک حکومت همه‌شمول در افغانستان است؛ زیرا ایجاد حکومت همه‌شمول می‌تواند منجر به پایان منازعه نیم قرن افغانستان و دستیابی به عدالت اجتماعی شود.

وی افزود این نشست یک نشست کارشناسی است و علیه هیچ نظام و کشور و یا سیاستی نیست، بلکه بستری برای گفت‌وگوی متنوع در رابطه به مسایل افغانستان است.

دهمین نشست امنیتی هرات در حالی در تاجیکستان آغاز می‌شود که این نشست همه ساله با میزبانی افغانستان برگزار می‌شد.