Այլ արժույթներով հաշվարկներ անելու ժամանակն է․ Լավրովը՝ Հայաստանի հետ ՌԴ առևտրի մասին

Ռուսաստանի արտգործնախարար Սերգեյ Լավրովը հայ գործընկեր Արարատ Միրզոյանի հետ ճեպազրույցի ժամանակ կեսկատակ առաջարկել է հրաժարվել դոլարից երկու երկրների միջև առևտրային ցուցանիշների հաշվարկներում:

Լավրովը նախ հայտնել է, որ Ռուսաստանը մնում է Հայաստանի առաջատար առևտրա-ներդրումային գործընկերը, դրա մասնաբաժինը Հայաստանի ընդհանուր առևտրում գերազանցում է 30 տոկոսը: Համաճարակի ընթացքում անկումից հետո հաջողվել է ապրանքաշրջանառությունը վերադարձնել կայուն աճի հետագիծ։ Անցյալ տարի այն կազմել է 2,6 մլրդ դոլար։

«Հավանաբար արդեն այլ արժույթներով է պետք հաշվել։ Բայց մենք ձեզ հետ հետո կպայմանավորվենք», - ասել է նա՝ դիմելով Միրզոյանին։

Տնտեսական համագործակցության առանցքային ոլորտների թվում ՌԴ արտգործնախարարն առանձնացրել է նաև ատոմային էներգետիկան, հանքարդյունաբերությունը, տրանսպորտը։

Այսօր Մոսկվայում կայացած բանակցությունների ժամանակ նախարարները պայմանավորվել են խթանել ուղիղ շփումները Հայաստանի և Ռուսաստանի գործարար շրջանակների միջև։

Նշենք, որ ապրիլի 8-ին Մոսկվայում կայացել են Հայաստանի ու Ռուսաստանի արտործնախարարների բանակցությունները, որոնց ընթացքում քննարկվել են, մասնավորապես, երկկողմ հարաբերություններին առնչվող հարցեր, ինչպես նաև Արցախում տիրող իրավիճակը:

armeniasputnik.am