ՄԱԿ ԱԽ-ն դատապարտել է Շահ Չերաղի ահաբեկչությունը
ՄԱԿ ԱԽ-ն մի հայտարարությամբ խստորեն դատապարտել է Իրանի Շահ Չերաղ սրբավայրում վերջերս տեղի ունեցած ահաբեկչությունը։
Հայտարարության մեջ ասվում է, որ ԱԽ անդամները դատապարտում են անմեղ մարդկանց և ուխտավորների վրա Շիրազի Շահ Չերաղ սրբավայրում իրականացված նողկալի և վախկոտ ահաբեկչական հարձակումը, որի պատասխանատվությունը ստանձնել է ԻԼԻՊ ահաբեկչական խմբավորումը և որի հետևանքով զոհվել է 2 և վիրավորվել՝ 8 քաղաքացի:
Ավելի վաղ Իրանը դիմել էր ՄԱԿ-ի Անվտանգության խորհրդին` կոչ անելով վերջ տալ լռությանը և դատապարտել այս ահաբեկչությունը:
Հարկ է նշել, որ Շահ Չերաղի ահաբեկչության հեղինակ Ռահմաթուլլա Նորոզաֆը սկզբում համացանցով ծանոթացել է ԻԼԻՊ-ի առաջնորդներից մեկի հետ, որից հետո մեկնել է Թուրքիա և դարձել խմբավորման անդամ:
Այնուհետև նա մեկնել է Աֆղանստան, որտեղ պատրաստվել է ԻԼԻՊ-ի ահաբեկչական գործողությունների համար:
Հարձակումից հետո Իրանի անվտանգության կառույցները հայտնաբերել են նրա բոլոր հաղորդագրությունները և աշխատում են երկրի ներսում գործող ահաբեկչական ցանցի հայտնաբերման ուղղությամբ:
