ՌԴ–ն և Իրանը պայմանավորվել են զարգացնել համագործակցությունը բարձր տեխնոլոգիաների ոլորտում
Ռուսաստանն ու Իրանը պայմանավորվել են զարգացնել համագործակցությունը բարձր տեխնոլոգիաների ոլորտում։
Հարցը քննարկվել է Մոսկվայում, գիտության, տեխնոլոգիաների և տնտեսության գիտածավալուն ոլորտների գծով Իրանի փոխնախագահ Դեհղանի Ֆիրուզաբադիի և ՌԴ փոխվարչապետ, արդյունաբերության և առևտրի նախարարության ղեկավար Դենիս Մանտուրովի հանդիպման ժամանակ։
Դեհղանի Ֆիրուզաբադին և Դենիս Մանտուրովը քննարկել և կարծիքներ են փոխանակել տեխնոլոգիական ոլորտներում երկու երկրների համագործակցության վերաբերյալ և նախանշել հետագա աշխատանքի պլանը։
Մանտուրովը նշել է, որ նախորդ տարվա արդյունքներով ռուս–իրանական ապրանքաշրջանառությունը, որի հիմնական մասը գյուղատնտեսական ապրանքներն ու պարենամթերքն են, ռեկորդային մակարդակի է հասել։
«Անհրաժեշտ է ջանքեր գործադրել առևտրի դիվերսիֆիկացման, բարձր ավելացված արժեքով արտադրանքի մասնաբաժնի ավելացման համար, այդ թվում` գիտելիքատար արդյունաբերություններում», – ընդգծել է նա։
Այդ աշխատանքում նախատեսվում է ներգրավել Ռուսաստանի և Իրանի գիտական կազմակերպությունները։
ՌԴ փոխվարչապետը իրանցի գործընկերոջը հրավիրել է այցելելու Եկատերինբուրգում 2024 թվականի հուլիսի 8-11-ը կայանալիք «Իննոպրոմ» միջազգային արդյունաբերական ցուցահանդեսը։
