ԻՀՊԿ-ի խոսնակ․ ԱՄՆ-ի ցանկացած թշնամական գործողության համար սցենար ունենք

Իսլամական հեղափոխության պահապանների կորպուսի խոսնակը, անդրադառնալով Իրանի նկատմամբ ԱՄՆ-ի տնտեսական ճնշումների սրմանը, հայտարարել է, որ Իսլամական Հանրապետությունը Վաշինգտոնի ցանկացած թշնամական գործողության, այդ թվում՝ տնտեսական պատերազմի դեմ հակազդելու հստակ սցենարներ ունի և փորձում է չեզոքացնել այդ ճնշումների հետևանքները։

Pars Today-ի հաղորդմամբ՝ գեներալ Հոսեյն Մոհեբին, քննադատելով Իրանի դեմ «ամենասաստիկ տնտեսական պատերազմի» մեկնարկի վերաբերյալ ԱՄՆ նախագահի հայտարարությունները, դրանք համարել է ռազմական ոլորտում թշնամու պարտության անուղղակի խոստովանություն և նշել, որ Իրանի նկատմամբ տնտեսական ճնշումները նորություն չեն և շարունակվել են տասնամյակներ շարունակ։
Նա ԱՄՆ-ի նոր գործողությունների հիմնական նպատակը համարել է հաղթանակի և իրանական հասարակական կարծիքի վրա ազդեցության պատրանք ստեղծելը և հավելել, որ Իսլամական Հանրապետությունը տնտեսական ճնշումների պայմաններում այլ երկրների հետ առևտրային հարաբերությունները պահպանելու տարբեր ուղիներ ունի։
ԻՀՊԿ-ի խոսնակը նաև ընդգծել է, որ Իրանն ընդլայնում է տնտեսական համագործակցությունը տարբեր երկրների հետ և շրջանցում ԱՄՆ-ի ճնշումները։ Նրա խոսքով՝ այդ քայլերի արդյունքները մոտ ապագայում տեսանելի կլինեն։