Իրան․ ԱՄՆ-ի ճնշման տակ Ավստրիան իրավասու չէ հյուրընկալել միջազգային կառույցների
Վիեննայում Իրանի դեսպանը, բացահայտելով ՄԱԳԱՏԷ-ի Գլխավոր համաժողովին Իրանի ատոմային էներգիայի կազմակերպության ղեկավարի մասնակցությունը կանխելու ԱՄՆ-ի խափանարարության մանրամասները, ընդգծել է, որ Վաշինգտոնի ճնշումը Ավստրիայի նկատմամբ և այդ երկրի համագործակցությունն ԱՄՆ-ի հետ կասկածի տակ են դրել միջազգային կառույցներ հյուրընկալելու Վիեննայի իրավասությունը։
Pars Today-ի հաղորդմամբ՝ հղում անելով IRNA գործակալությանը, ՄԱԳԱՏԷ-ի 70-րդ Գլխավոր համաժողովում Ռեզա Նաջաֆին հայտարարել է․ «Որպես Վիեննայում տեղակայված միջազգային կազմակերպությունները հյուրընկալող երկիր իր պարտավորությունները կատարելիս Ավստրիայի կառավարության վարած քաղաքականության և դրսևորած գործունեության անընդունելի արդյունքները կասկած չեն թողնում, որ այս երկիրը նման կարգավիճակ ունենալու իրավասություն չունի»։
Ավելի վաղ ԱՄՆ ներկայացուցիչը հստակորեն խոստովանել էր, որ Վաշինգտոնը դեմ է արտահայտվել Իրանի ատոմային էներգիայի կազմակերպության ղեկավար Մոհամադ Էսլամիի համար ուղևորության թույլտվություն ստանալու հայցին, և որ այդ դիրքորոշումը հանգեցրել է նրա ուղևորության հայցի մերժմանը։ Այս քայլը հիմնավորելու համար ԱՄՆ-ն մեղադրանքներ է առաջ քաշել՝ կապված Գործակալության հետ Իրանի համագործակցության և համաժողովին Էսլամիի ներկայությունը քարոզչական նպատակներով օգտագործելու հետ։
Նաջաֆին Էսլամիի մուտքի արտոնության չեղարկման վերաբերյալ Ավստրիայի ներկայացրած վարկածը անվանել է «ամբողջովին խեղաթյուրված» և զարմանալի է համարել ժամկետն ավարտված բանաձևերին կամ գոյություն չունեցող հանձնաժողովին հղում կատարելը՝ հյուրընկալող երկրի պարտավորությունների խախտումը հիմնավորելու համար։
Նա ընդգծել է, որ Իրանի պատվիրակության ղեկավարի համար մուտքի արտոնության դիմումը ներկայացվել էր մեկ ամիս առաջ, և նրա վիզան արդեն տրամադրվել էր, սակայն դրանից հետո, պատժամիջոցների պատրվակով, նրան թույլ չեն տվել մուտք գործել երկիր։ Նաջաֆիի խոսքով՝ սա ցույց է տալիս, որ մուտքի արտոնության չեղարկումն իրականացվել է կոնկրետ մի երկրի ճնշման ներքո, իսկ այդ քայլից հետո միայն դրա իրավական հիմնավորումն է ստեղծվել։
Իրանի դեսպանը նաև հերքել է «snapback» մեխանիզմի ինքնաբերաբար գործարկման մասին պնդումը՝ ընդգծելով, որ 2231 բանաձևի գործողության ժամկետն ավարտվել է 2025 թվականի հոկտեմբերի 18-ին, և Իրանի նկատմամբ ճնշում գործադրելու նպատակով ՄԱԿ-ի Անվտանգության խորհրդի մեխանիզմների գործիքային օգտագործումը իրավական հիմք չունի։
Նաջաֆին նախազգուշացրել է, որ ԱՄՆ-ի շահերն առաջ մղելու համար ՄԱԳԱՏԷ-ն որպես գործիք օգտագործելը՝ ի վնաս թե՛ այդ կառույցի, թե՛ հյուրընկալող երկրի հեղինակության, վտանգավոր գործընթաց է, որը պետք է դադարեցվի։
