«Արաքս» ազատ գոտու կազմակերպությունը պատրաստ է հյուրընկալել Հայաստանի և Թուրքիայի զբոսաշրջային տուրերը
Իրանի հյուսիս-արևմուտքում գտնվող «Արաքս» ազատ գոտու կազմակերպության գործադիր տնօրենը Թուրքիայի ու Հայաստանի զբոսաշրջային գործակալությունների տնօրենների հետ հանդիպմանն ընդգծել է այդ կազմակերպության պատրաստակամությունը Հայաստանի և Թուրքիայի զբոսաշրջային տուրերը հյուրընկալելու համար։
Այս հանդիպման ընթացքում Իրանի «Արաքս» ազատ գոտու կազմակերպության տնօրենների խորհրդի նախագահ և գործադիր տնօրեն Մաջիդ Քիանին հանդիպում և զրույց է ունեցել Թուրսափ ընկերության ներկայացուցչության տնօրենի (Անկարա), Հայաստանի Զբոսաշրջության ֆեդերացիայի նախագահի և Թուրքիայի ու Հայաստանի զբոսաշրջային գործակալությունների ներկայացուցիչների հետ։
«Արաքս» ազատ գոտու զբոսաշրջային բացառիկ հնարավորությունները զբոսաշրջիկներին և օտարերկրյա հյուրերին ծանոթացնելու գործում մատնանշելով տարբեր միջոցառումների անցկացման կարևորությունը, Քիանին ասել է․-Չնայած Արաքսի ուժեղ և դրական կողմերին, պոտենցիալներին, զբոսաշրջության տարբեր ենթակառուցվածքներին, պատմական հուշարձաններին և անաղարտ բնությանը, այս ոլորտում կան նաև թերություններ, և մենք ակնկալում ենք, որ հյուրերը կօգնեն մեզ վերացնել թերությունները և բարելավել ենթակառուցվածքները։
Հանդիպմանը Հայաստանի Զբոսաշրջության ֆեդերացիայի նախագահ՝ Մեխակ Ապրեսյանը Նռան փառատոնի և պատմական հուշարձանների գրանցման նման միջոցառումների անցկացումը շրջադարձային է համարել հարաբերությունների ամրապնդման, զբոսաշրջիկների փոխանակման և բարեկամ ու հարևան ժողովուրդների՝ Իրանի և Հայաստանի կարողություններին ու մշակույթներին ավելի լավ ծանոթանալու հարցում։
Ապրեսյանն առաջարկել է, որ նման միջոցառումները շարունակաբար անցկացվեն ամեն տարի և որոշակի ժամանակ, երկու երկրների միջև ամենամոտ աշխարհագրական կետում։