Իրան-Կուբա հանդիպմանը քննարկվել են ամերիկյան անօրինական պատժամիջոցների հետևանքները
Իրանի Ռազի կենտրոնի և Պաստերի ինստիտուտի և կուբայական մի շարք ընկերությունների ներկայացուցիչների համատեղ հանդիպմանը քննարկվել են ամերիկյան ապօրինի և միակողմանի պատժամիջոցների հետևանքները, որոնք խոչընդոտում են կենսաբանական գիտությունների ոլորտի տեխնոլոգիաներից օգտվելուն։
Հանդիպումը կայացել է Շվեյցարիայի Ժնև քաղաքում՝ Կենսաբանական զենքի կոնվենցիայի (BTWC) ամրապնդման աշխատանքային խմբի չորրորդ նիստի շրջանակներում։
Pars Today-ի փոխանցմամբ՝ Իրանի Ռազի կենտրոնի և Պաստերի ինստիտուտի ներկայացուցիչ Քեյհան Ազադմանեշը հանդիպմանը ներկայացրել է ԻԻՀ ձեռքբերումները կենսաբանական գիտությունների ոլորտում։
Նա անդրադարձել է նաև պատվաստանյութերի և շիճուկների արտադրության ոլորտում միջազգային համագործակցությանն ինչպես նաև կենսաբանական գիտությունների ոլորտում վերապատրաստման դասընթացներ անցկացնելուն այնպիսի երկրների հետ, ինչպիսիք են Սենեգալը, Մավրիտանիան, Մալին, Ուզբեկստանը և Կուբան։
Նշելով, որ Պաստերի ինստիտուտն արդեն 104 տարեկան է, Ազադմանեշը խոսել է ինստիտուտի դերի մասին այնպիսի հիվանդությունների վերահսկման և վերացման գործում, ինչպիսիք են ջրծաղիկը, ժանտախտը, տուբերկուլյոզը և Covid-19-ը։ Անդրադառնալով գիտության և պատվաստանյութի արտադրության ոլորտներում ինստիտուտի միջազգային համագործակցության կարևորությանը, նա խոսել է Կուբայի հետ հեպատիտ B-ի և Covid 19-ի պատվաստանյութերի արտադրության ոլորտում ինստիտուտի համագործակցության մասին։
Քեյհան Ազադմանեշը կոչ է արել կենսաբանական կոնվենցիայի շրջանակներում ստեղծել գիտական և առողջապահական համագործակցությունը երաշխավորող մեխանիզմներ։
Կենսաբանական զենքի մշակման, արտադրության և պահեստավորման արգելման մասին կոնվենցիան՝ որպես զանգվածային ոչնչացման զենքի արգելման միջազգային պայմանագիր, ուժի մեջ է մտել 1975 թվականի մարտին։ Մինչ այժմ կոնվենցիայի անդամ է դարձել 187 պետություն։
Կոնվենցիայի 10-րդ հոդվածի համաձայն՝ բոլոր անդամներն ունեն կենսաբանական գիտությունների խաղաղ շահագործման իրավունք և պարտավոր են դյուրացնել միմյանց լիարժեք հասանելիությունը անհրաժեշտ սարքավորումներին, նյութերին և տեղեկատվությանը:
Սակայն ԱՄՆ-ն անօրինական պատժամիջոցներ ու սահմանափակումներ կիրառելով, խախտում է միջազգային այդ թվում՝ վերոնշյալ կոնվենցիայով ստանձնած պարտավորություններն ինչպես նաև երկրների՝ միջազգային համագործակցության և կենսաբանական գիտությունների ոլորտի տեխնոլոգիաներից օգտվելու իրավունքը։