Քանանի․ Իրանի ռազմավարական հայացքն ուղղված է դեպի Արևելք
ԻԻՀ ԱԳՆ խոսնակը հայտարարել է, որ արևելյան երկրներն Իրանի կառավարության արտաքին քաղաքականության առաջնահերթություններից են, հավելելով․ «Իրանի ռազմավարական հայացքն ուղղված է դեպի Արևելք»։
Նասեր Քանանին հայտարարել է․ «Ռուսաստանի և Չինաստանի հետ հարաբերությունները կշարունակվեն լրջությամբ և վճռականությամբ։ Իսկ ստորագրված փաստաթղթերի գործադրումը և համագործակցության շարունակությունը կապահովի մեր ընդհանուր շահերը»։
Pars Today-ի հաղորդմամբ՝ Քանանին հավելել է. «Արևելքի հետ հարաբերությունները չեն ենթադրում անտեսել այլ տարածաշրջաններն ու երկրները։ Հետևաբար, Արևելքի և ասիական երկրների հետ հարաբերությունների զարգացմանը զուգահեռ, մենք ուշադրություն ենք դարձնում նաև հեռավոր երկրների հետ հարաբերություններին»:
Նա նշել է․ «Մենք ողջունում ենք ցանկացած երկրի, որը ցանկանում է կառուցողական հարաբերություններ ունենալ Իրանի հետ»։
Նշելով, որ Իրանի 14-րդ կառավարությունը նույնպես կարևորում է հարևանության քաղաքականությունը, Քանանին ասել է․ «Տարածաշրջանում առկա են տարբեր խնդիրներ, և հարցերի լուծման լավագույն միջոցը տարածաշրջանային համագործակցությունն է»։