Իրանցի նախարարը հանդես է եկել Ադրբեջանի տարածքով Ռուսաստանի հետ էլեկտրացանցերը միացնելու օգտին
Ռուսաստանն ու Իրանը ունեն մեծ էլեկտրական ցանցեր, և եթե այդ ցանցերը միացվեն, նրանք կարող են տարածաշրջանում էլեկտրաէներգիայի հզոր աղբյուր ստեղծել, որից կարող են օգտվել այլ երկրներ: Այս մասին հայտարարել է Իրանի էներգետիկայի նախարար Աբբաս Ալիաբադին։
Ռուսաստանի էներգետիկայի նախարար Սերգեյ Ցիվիլիևի հետ հանդիպման շրջանակում Ալիաբադին նշել է, որ Ռուսաստանն Իրանի առանցքային հարևաններից մեկն է և առանձնահատուկ նշանակություն ունի հարևան մյուս երկրների շարքում, հայտնում է IRNA-ն։
«Այս հանդիպմանը երկու կարևոր հարց է բարձրացվել՝ կապված Սիրիկ էլեկտրակայանի կառուցման և Իրանի և Ռուսաստանի միջև էլեկտրական կապերի ստեղծման ու ամրապնդման հետ»,- ասել է Ալիաբադին։
«Ինչ վերաբերում է Սիրիկ էլեկտրակայանին, ապա Իրանի և Ռուսաստանի միջև պայմանագիր է կնքվել, և մենք շահագրգռված ենք դրա իրագործմամբ։ Ռուսական կողմը նույնպես հետաքրքրություն է ցուցաբերում այդ հարցում իրանական ընկերությունների հետ համագործակցելու հարցում»,- հավելել է նա։
«Մենք վաղուց առաջարկներ ենք ներկայացրել՝ ամրապնդելու այդ էլեկտրական կապը երկու երկրների համագործակցության միջոցով՝ օգտագործելով Ադրբեջանի տարածքը», - ասել է իրանցի դիվանագետը՝ նշելով, որ մինչ այժմ Իրանի և Ռուսաստանի միջև կայուն էլեկտրական կապ չի եղել։
«Ռուսաստանն ու Իրանը ունեն մեծ էլեկտրական ցանցեր, և եթե այդ ցանցերը միացվեն, նրանք կկարողանան էլեկտրաէներգիայի հզոր աղբյուր ստեղծել տարածաշրջանում, որից կարող են օգտվել նաև այլ երկրները», - ընդգծել է նախարարը։
news.am