Հայաստանն ու մյուս հարևաններն Իրանի հետ համագործակցության զգալի ներուժ ունեն. Փեզեշքյան
Հայաստանն ու Իրանի մյուս հարևաններն Իրանի Իսլամական Հանրապետության հետ համագործակցության մեծ ներուժ ունեն։
IRNA-ի փոխանցմամբ՝ այս մասին հայտարարել է Իրանի նախագահ Մասուդ Փեզեշքյանն Ազգային անվտանգության և արտաքին քաղաքականության խորհրդարանական հանձնաժողովի անդամների հետ հանդիպման ժամանակ:
Ինչպես նշել է Փեզեշքյանը, Թեհրանին անհրաժեշտ է շտապ բարելավել հարաբերությունները հարևանների հետ: Նրա կարծիքով՝ տարածաշրջանային կապերի ամրապնդումը կարող է օգնել նվազագույնի հասցնել արևմտյան պատժամիջոցների հետևանքները։
«Եթե մենք ամրապնդենք հարաբերությունները հարևանների հետ, պատժամիջոցներն անարդյունավետ կդառնան։ Այսօր առավել, քան երբևէ մեզ անհրաժեշտ է բարելավել կապերը մեր հարևանների և տարածաշրջանի երկրների հետ»,- նշել է Իրանի նախագահը։
Նրա խոսքով՝ Պակիստանը, Աֆղանստանը, Թուրքմենստանը, Հայաստանը, Ադրբեջանը, Թուրքիան, Իրաքը և Իրանի հարավային հարևանները համագործակցության զգալի ներուժ ունեն, որը պետք է գործի դնել ընդհանուր շահերի ապահովման համար:
Փեզեշքյանը նշել է, որ լիազորությունների պատվիրակումը, հատկապես սահմանամերձ նահանգներում, թույլ կտա տեղական իշխանություններին ընդլայնել համագործակցությունը հարևան երկրների հետ:
