Ինչո՞ւ է Պենտագոնը վախենում Իրանի ստորջրյա հրթիռից

Իրանի և ԱՄՆ-ի միջև ռազմական լարվածության աճի և Պարսից ծոցում ու Արաբական ծովում ԱՄՆ ռազմածովային ստորաբաժանումների լայնածավալ տեղակայման ֆոնին, Իրանի ստորջրյա կարողությունները մտահոգում են Պենտագոնին։ Մասնավորապես՝ ամերիկացիների ուշադրության կենտրոնում է «Հութ» տորպեդը՝ որպես զսպող զենք։

Pars Today-ի փոխանցմամբ՝ «Հութ» տորպեդն Իրանի ամենաառաջադեմ ռազմածովային զենքերից մեկն է՝  շատ բարձր արագության,  պայթուցիկ ուժի և հիպերձայնային տեխնոլոգիայի օգտագործման շնորհիվ։ Ամերիկացի պաշտոնյաներն այն համարում են լուրջ սպառնալիք իրենց նավերի համար։
Տորպեդը  ներկայացվել է 2006 թվականին ԻՀՊԿ «Մեծ մարգարե» զորավարժությունների ժամանակ, անակնկալի բերելով  արևմտյան ռազմական փորձագետներին։ Իսլամական հեղափոխության պահապանների կորպուսի ռազմածովային ուժերի հրամանատարները հայտարարել են, որ «Հութն» աշխարհի ամենաարագ տորպեդն էր իր ներդրման պահին, և մարտական կարողությունների առումով այն համեմատելի է առաջադեմ ռուսական «Շկվալ» տորպեդոյի հետ. տեխնոլոգիա, որը հասանելի է միայն Իրանին և Ռուսաստանին։

Հայտարարվել է, որ տորպեդի արագությունը հասնում է 360 կիլոմետր ժամի, ինչը նշանակում է, որ թիրախային նավը գործնականում ոչ մի հնարավորություն չունի արձագանքելու կամ փախուստի դիմելու: Մասնագետների կարծիքով, մի քանի «Հութ» տորպեդների միաժամանակ արձակումը կարող է լուրջ սպառնալիք ներկայացնել խոշոր նավերի և նույնիսկ ամերիկյան ավիակիրների համար։
Ռազմական վերլուծաբանները ընդգծում են, որ «Հութը» կրկնակի կարևոր է Հորմուզի նեղուցում. ռազմավարական ջրային ուղի, որի աշխարհագրական սահմանափակումները մեծացնում են նման արագընթաց զենքի գերազանցությունը և կարող են զգալիորեն փոխել ռազմածովային ուժերի հավասարակշռությունը Իրանի օգտին։