Բաղայի. ՄԱԳԱՏԷ-ի տեսուչների կողմից վնասված միջուկային օբյեկտներ ստուգման ծրագիր չունենք
Իրանի ԱԳՆ խոսնակ Իսմայիլ Բաղային հայտարարել է, որ Իրանը չի նախատեսում ՄԱԳԱՏԱԷ-ի տեսուչների կողմից ԱՄՆ-ի և սիոնիստական ռեժիմի հարձակումներից վնասված միջուկային օբյեկտների ստուգում։
Pars Today-ի փոխանցմամբ՝ անդրադառնալով ամերիկացի պաշտոնյաների այն պնդումներին, թե միջուկային բանակցություններ են սկսվել և տեսուչներ են մեկնում Թեհրան, Բաղային նշել է. «Մենք ոչ մի հանդիպում չենք ունեցել ՄԱԳԱՏԷ-ի գլխավոր տնօրեն Ռաֆայել Գրոսիի հետ և չունենք որևէ ծրագիր՝ վնասված միջուկային օբյեկտներում գործակալության այցերի անցկացնելու համար։ Այս հարցի վերաբերյալ որևէ ընթացակարգ գոյություն չունի, և մենք շարունակելու ենք գործել Միջուկային զենքի չտարածման պայմանագրի (NPT) շրջանակներում»։
Անդրադառնալով Իրանի սառեցված ակտիվների օգտագործմանը և ԱՄՆ-ի հայտարարություններին՝ Բաղային ասել է. «Հետաքրքիր է, որ պատերազմի նպատակը, որը, ըստ նրանց, Իրանի քաղաքակրթության ոչնչացումն ու երկրի փլուզումն էր, այժմ ներկայացվում է որպես ամերիկացի ֆերմերներին հարստացնելու միջոց։ Իրանի ակտիվների վերաբերյալ որոշումները կընդունվեն միայն Իրանի ժողովրդի շահերից ելնելով»։
Խոսելով Լիբանանում հակամարտության կանխարգելման մեխանիզմի և իսրայելական ուժերի դուրսբերման վերաբերյալ պայմանավորվածությունների մասին՝ նա ընդգծել է, որ հրադադարի համաձայնությունից հետո Իսրայելը շարունակել է խախտել այն և հարձակումներ իրականացնել Լիբանանի դեմ։
Բաղային նշել է, որ Լիբանանում պատերազմի դադարեցումը հրադադարի հուշագրի անբաժանելի մասն է, իսկ ԱՄՆ-ի ստանձնած պարտավորությունները լիովին հստակ են և որևէ արդարացում ընդունելի չէ։
Նրա խոսքով՝ համաձայնեցված մեխանիզմի շրջանակում Իրանը, ԱՄՆ-ը, միջնորդ երկրները և Լիբանանի կառավարությունը վերահսկում են հուշագրի առաջին կետի իրականացումը և փորձում կանխել նոր ռազմական բախումները։
Իրանի նավթի վաճառքի համար նախատեսված բացառությունների վերաբերյալ Բաղային ասել է, որ ԱՄՆ ֆինանսների նախարարության համապատասխան թույլտվությունը տրվել է երկուշաբթի օրը և ուժի մեջ է մտել հրապարակման պահից։
Հորմուզի նեղուցի կառավարման հարցում Օմանի դերի մասին խոսելով՝ նա նշել է, որ թե՛ Իրանը, թե՛ Օմանը նեղուցի ափամերձ երկրներ են, ուստի նավերի անվտանգ երթևեկությունն ապահովելու համար անհրաժեշտ է երկու երկրների միջև մշտական համակարգում։