Ղալիբաֆ․ Իրանի դեմ ԱՄՆ–ի տնտեսական շրջափակումը ապարդյուն է լինելու
Pars Today — Իրանի Իսլամական խորհրդարանի նախագահը Կատարի վարչապետ, արտաքին գործերի նախարար՝ Շեյխ Մոհամմադ բեն Աբդուլռահման Ալ Թանիի հետ հանդիպման ժամանակ, անդրադառնալով Իսլամաբադի փոխըմբռնման հուշագրի իրականացման հարցում ԱՄՆ-ի կողմից պարտավորությունների խախտմանը, ինչպես նաև Իրանի տնտեսական շրջափակման ծրագրին, ասել է․ «Վաշինգտոնի տնտեսական ճնշումները Իրանի դեմ ապարդյուն են լինելու, և Իրանի ժողովուրդը արժանապատվորեն կվերականգնի իր իրավունքները»։
Ինչպես հաղորդում է Pars Today-ը՝ հղում կատարելով IRIB-ին, Իրանի Իսլամական խորհրդարանի նախագահ Մոհամմադ Բաղեր Ղալիբաֆը հանդիպել է Թեհրան ժամանած Կատարի վարչապետ, արտաքին գործերի նախարար Շեյխ Մոհամմադ բեն Աբդուլռահման Ալ Թանիի հետ։
Ղալիբաֆը, անդրադառնալով Իսլամաբադի փոխըմբռնման հուշագրի իրականացման հարցում ԱՄՆ-ի կողմից իր ստանձնած պարտավորությունների խախտմանը, որի միջնորդներից էր նաև Կատարը, ընդգծել է․ «Թրամփի վարչակազմը սխալ տեղեկությունների հիման վրա սխալ որոշումներ է կայացնում, և նման սխալ հաշվարկներով ոչ միայն վտանգում է հենց ԱՄՆ-ի ֆինանսական, ռազմական և մարդկային ռեսուրսներն ու տարածաշրջանի ապագան, այլև թիրախավորում է Իրանի ժողովրդի շահերը և տարածաշրջանում առաջացնում երկարատև անկայունություն»։
Իրանի Իսլամական խորհրդարանի նախագահը ԱՄՆ-ի թշնամական գործողությունների նոր օրինակ է համարել Իրանի դեմ տնտեսական շրջափակման ծրագիրը և ասել․ «Ամերիկյան այս ծրագիրը նույնպես արդյունք չի տա, և Իրանի ժողովուրդը արժանապատվորեն կվերականգնի իր իրավունքները։ Իսկ ԱՄՆ-ն պետք է իրականացնի այն պայմանները, որոնց կատարմանը պարտավորվել է փոխըմբռնման հուշագրով»։
Շեյխ Ալ Թանին նույնպես հանդիպման ընթացքում ողջունել է Հորմուզի նեղուցում ծովային երթևեկության հարցում Իրանի և Օմանի ձեռք բերած փոխըմբռնումը՝ նշելով, որ քաղաքական զարգացումների ընթացքը կարող է նպաստել տարածաշրջանում կայունության վերականգնմանը։
Կատարի վարչապետ, արտաքին գործերի նախարարը շեշտել է իր երկրի ջանքերը՝ տարածաշրջանում կայունության վերականգնմանն ուղղված լուծումները առաջ մղելու ուղղությամբ։